Հիվանդությունների վերահսկման և կանխարգելման
աֆրիկյան կենտրոնները հայտարարել են հանրային առողջության ոլորտում արտակարգ
դրություն՝ կապված mpox-ի բռնկման հետ, որը ավելի վաղ հայտնի էր որպես կապիկի ծաղիկ: Այս մասին
հայտնում է Reuters գործակալությունը՝ հղում անելով կազմակերպության գլխավոր
տնօրեն Ժան Քասեյայի ճեպազրույցին։
Այժմ հիվանդության դեպքեր են գրանցվել
Աֆրիկայի 18 երկրներում, տարեսկզբից գրանցվել է ավելի քան 15 հազար դեպք և 461
մահ, ինչը 160 տոկոսով ավելի է նախորդ տարվա նույն ժամանակահատվածի համեմատ։
Դեպքերի ավելի քան 90%-ը տեղի է ունենում Կոնգոյի Դեմոկրատական Հանրապետությունում։
Աֆրիկյան որոշ երկրներ՝ Բուրունդին, Քենիան,
Ռուանդան և Ուգանդան, առաջին անգամ հայտնել են mpox վարակների մասին, ասել է Քասեյան:
«Սա ցույց է տալիս հիվանդության տարածումը զսպելու համար հավաքական և
համագործակցային մոտեցման անհրաժեշտությունը»,- ավելացրել է նա:
Նրա խոսքով՝
հիվանդությունը վերահսկելու համար Աֆրիկային անհրաժեշտ է 10 միլիոն չափաբաժին պատվաստանյութ,
մինչդեռ ներկայումս հասանելի է միայն 200 հազարը:
