Սիրիայում Բաշար ալ-Ասադի ռեժիմի տապալումից հետո, որը Կրեմլի ամենամեծ դաշնակիցն էր Մերձավոր Արևելքում, ռուսական պետական ​​լրատվամիջոցները փորձեցին նսեմացնել տեղի ունեցածի նշանակությունը Մոսկվայի համար՝ հայտարարելով, որ Ուկրաինայի պատերազմն է առաջնահերթություն: Միևնույն ժամանակ, գրում է The Times-ը, Կրեմլի ոչ բոլոր կողմնակիցներն են ընդունել այդ տեսակետը, և ոմանք արդեն կատարվածն անվանում են «Ռուսաստանի հսկայական աշխարհաքաղաքական պարտություն»։

Վերլուծաբանների կարծիքով՝ «Պուտինի մոլուցքը Ուկրաինայի պատերազմով հանգեցրել է այլ երկրներում տեղի ունեցող իրադարձությունների վրա Ռուսաստանի ազդեցության հնարավորության նվազման, այդ թվում՝ Սիրիայում Կրեմլի ռազմական-ռազմավարական հնարավորությունների թուլացման»:

«Ռուսաստանը Սիրիայում ներկա է դեռ խորհրդային ժամանակներից։ Իսկ Պուտինը երկու շաբաթվա ընթացքում փչացրեց ամեն ինչ: Եվ հանուն ինչի՞. գրավելու համար ևս մեկ գյո՞ւղ Ուկրաինայում»,- նշել է մոսկովյան լրագրողներից մեկը։.

«Ռազմավարությունների և տեխնոլոգիաների վերլուծության կենտրոնի» մոսկովյան վերլուծական կենտրոնի ղեկավար Ռուսլան Պուխովը նշում է, որ Մոսկվան ներկայումս չունի բավարար ռազմական ուժ, ռեսուրսներ, ազդեցություն և հեղինակություն նախկին Խորհրդային Միության սահմաններից դուրս արդյունավետ ռազմական միջամտության համար:

«Քո ուժի և հնարավորությունների մասին կարող ես բլեֆ անել համաշխարհային հարթակում, բայց կարևոր է չսկսես հավատալ սեփական բլեֆիդ»,- ասել է նա:

Միևնույն ժամանակ, գրում է The Times-ը, կա տարբերակ, որ Սիրիան Պուտինի համար կարևոր էր, որովհետև թույլ էր տալիս իրեն մարտահրավեր նետել Արևմուտքին և փորձարկել նոր զենքեր, ինչը նա այժմ կարող է անել Ուկրաինայում շատ ավելի մեծ մասշտաբով։ Մտահոգություններ կան նաև, որ եթե Ռուսաստանն ամբողջությամբ դուրս բերի իր զորքերը Սիրիայից, ապա դրանք կվերաբաշխի Դոնբասի մարտադաշտերում:

Հարկ է նշել, որ Ռուսաստանի ձախողումը Սիրիայում տեղի է ունենում այլ երկրներում նրա ազդեցության թուլացման ֆոնին։