Մոսկվան անհրաժեշտ է համարում «որքան հնարավոր է շուտ» վերսկսել Վաշինգտոնի հետ սպառազինությունների վերահսկման շուրջ բանակցությունները, ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը։ Նրա խոսքերը մեջբերում է «Ինտերֆաքս» գործակալությունը։ Պեսկովը լրագրողների հետ զրույցում այսպես է մեկնաբանել ԱՄՆ նախագահ Դոնալդ Թրամփի հայտարարությունը. վերջինս հայտարարել է, որ Մոսկվան և Վաշինգտոնը մոտ էին միջուկային զինանոցի կրճատման մասին համաձայնագրի կնքմանը։

Կրեմլի ներկայացուցիչը հավելել է, որ սպառազինությունների վերահսկման ոլորտում պայմանագրա-իրավական բազան «էականորեն խարխլվել է, ընդ որում՝ ոչ Ռուսաստանի մեղքով»։ Պեսկովի խոսքով՝ Ռուսաստանի և ԱՄՆ-ի միջև բանակցությունների վերսկսումը բխում է «ամբողջ աշխարհի, (երկու երկրների) ժողովուրդների շահերից»:

«Իհարկե, մենք շահագրգռված ենք, որ այս բանակցային գործընթացը հնարավորինս շուտ սկսվի։ Բայց ես ուզում եմ հիշեցնել նախագահ Պուտինի խոսքերը, որ ներկա պայմաններում, իհարկե, անհրաժեշտ է ուշադրություն դարձնել բոլոր միջուկային պոտենցիալներին։ Չի կարելի, օրինակ, բանակցություններ վարել և ուշադրություն չդարձնել Ֆրանսիայի և Մեծ Բրիտանիայի պոտենցիալներին»,- հավելել է Պեսկովը։  

ՌԴ նախագահի մամուլի քարտուղարն ասել է, որ «(ԱՄՆ-ի հետ) խոսել պետք է, սակայն ժամանակը մեծ մասամբ բաց է թողնվել»։ «Մենք նախկինում խոսել ենք այստեղ նման շահագրգռվածության մասին, ուստի գնդակը ամերիկացիների դաշտում է, որոնք խզել են բոլոր պայմանագրերը, բոլոր առարկայական շփումները մեր երկրի հետ»,- ընդգծել է Պեսկովը։