ՌԴ նախագահ Վլադիմիր Պուտինը շնորհավորել է Բելառուսի իր գործընկեր Ալեքսանդր Լուկաշենկոյին պետության ղեկավարի պաշտոնում վերընտրվելու կապակցությամբ։ Այս մասին հայտնում է Կրեմլի պաշտոնական կայքը։
Ռուսաստանի ղեկավարը հեռագիր է ուղարկել Բելառուսի նախագահին և նրա հաղթանակը հանրապետությունում կայացած ընտրություններում անվանել համոզիչ։ Պուտինի խոսքով՝ քվեարկության արդյունքները վկայում են Լուկաշենկոյի «բարձր քաղաքական հեղինակության և քաղաքացիների կողմից նրա ընտրած պետական կուրսի աջակցության մասին»։
«Վերջին ժամանակներս մեզ հաջողվեց շատ բան անել Մոսկվայի և Մինսկի միջև
բարեկամական կապերի ամրապնդման համար։ Եվ, իհարկե, մենք կշարունակենք համատեղ
աշխատանքը ռուս-բելառուսական բազմապլան համագործակցության հետագա զարգացման
ուղղությամբ»,- ասված է նամակում։
ՌԴ նախագահը նաև հույս է հայտնել, որ
երկու երկրները կշարունակեն միջոցներ ձեռնարկել Միութենական պետության
ինստիտուտների արդյունավետությունը բարձրացնելու և Եվրասիայում փոխշահավետ
ինտեգրացիոն գործընթացները առաջ մղելու համար։
Պուտինը Լուկաշենկոյին մաղթել է առողջություն և նորանոր հաջողություններ
պետության ղեկավարի պաշտոնում։ Նա հավելել է, որ «մոտ ժամանակներս» ակնկալում է իր
բելառուս գործընկերոջ պաշտոնական այցը Մոսկվա։
«Դուք միշտ ցանկալի
և թանկ հյուր եք ռուսական հողում»,- հավելել է ՌԴ ղեկավարը։
