ԵՄ անդամակցության գործընթաց սկսելու
Հայաստանի նախաձեռնությունը չի քննարկվելու ուրբաթ օրը Ալմաթիում կայանալիք Եվրասիական միջկառավարական խորհրդի
նիստում։ Այս մասին հայտարարել է ՌԴ փոխվարչապետ Ալեքսեյ Օվերչուկը։
Ի պատասխան հարցի՝ կքննարկվի՞ արդյոք ԵՄ-ին ինտեգրվելու Հայաստանի ձգտումը, Օվերչուկն
ասել է, որ օրակարգն արդեն հաստատված է, և «այդ հարցերն այստեղ չեն բարձրացվի»։
Նա հավելել է, որ
Հայաստանը ԵԱՏՄ-ում ակտիվ դերակատարում ունի և իրեն կառուցողական է պահում։
«Ինչպես բազմիցս ասել եմ, Հայաստանը ԵԱՏՄ-ում հիմնական բենեֆիցիարն է: Անցած տարի առևտուրը
կազմել է 12 միլիարդ դոլար, ինչը մի քանի անգամ գերազանցում է ԵՄ-ի հետ Հայաստանի առևտրի ծավալը:
Միևնույն ժամանակ առևտուրը ԵԱՏՄ երկրների հետ
աճում է, ԵՄ-ի հետ՝ նվազում, ինչը այլ խոսքերից ավելի լավ է բնութագրում տնտեսության իրական վիճակը»,- ասել է ՌԴ փոխվարչապետը։
Միաժամանակ ՌԴ
փոխվարչապետը կրկնել է, որ Եվրամիությանը Հայաստանի անդամակցության սկիզբը
կնշանակի ԵԱՏՄ-ից նրա դուրս գալու սկիզբ։
«Այստեղ լուծումն
ակնհայտ է. Եվրամիության հետ շուկաների բացումը կնշանակի Եվրասիական տնտեսական
միության հետ շուկաների փակում: Այլապես կտուժեն Եվրասիական տնտեսական միության
մեր արտադրողները... Սա ակնհայտ է, ԵՄ-ի հետ ներմուծման մաքսային դրույքաչափերի
զրոյացումը ինքնաբերաբար կնշանակի վերադարձ մաքսային և մաքսային տարիֆին ԵԱՏՄ-ի
հետ… Ոչ ոք այստեղ պատրանքներ չպետք է ունենա»,- նշել է Օվերչուկը։
Նա վստահ է, որ «դա
բացարձակապես ակնհայտ է ցանկացած մարդու համար, ով թեկուզ մի փոքր ծանոթ է, թե
ինչպես են կառուցված այս երկու ինտեգրացիոն միրավորումները»։ Հայկական կողմը, ըստ
ՌԴ փոխվարչապետի, միանգամայն հստակ գիտի, թե դա ինչ հետևանքներ կունենա։
