Գյումրիում մարտի 30-ին կայանալիք համայնքապետի ընտրություններին ընդառաջ՝ մասնակից քաղաքական ուժերը արդեն իսկ խոսում են հետընտրական հնարավոր կոալիցիաների մասին։

Հրապարակված սոցհարցումների համաձայն՝ երկրորդ տեղում է Կոմունիստական կուսակցությունից առաջադրված Վարդան Ղուկասյանը, որի հետ, ըստ մամուլի հրապարակումների, կոալիցիա կկազմեն մյուս երեք ընդդիմադիր ուժերը։

Civic.am-ի հետ զրույցում նման հնարավորությունն արդեն իսկ չի բացառել Ռուբեն Մխիթարյանի ներկայացուցիչը՝ ընդգծելով, որ թեկնածուն կոալիցիան բացառում է միայն իշխող ուժի հետ։ Մարտուն Գրիգորյանի ներկայացուցիչն էլ նշել է, որ իրենք հաղթելու են գնում։

Civic.am-ը «Մայր Հայաստան» դաշինքի թեկնածու Կարեն Սիմոնյանից ևս հետաքրքրվեց՝ արդյոք հնարավո՞ր է Վարդան Ղուկասյանի հետ հետընտրական կոալիցիան, եթե նա զբաղեցնի երկրորդ տեղը։ Մեր հարցադրմանն ի պատասխան Սիմոնյանն ասաց. «Դուք ենթադրություն եք արել՝ ով առաջին, ով երկրորդ... ես հայտարարություն եմ արել, թե որ ուժերի հետ չեմ միանում՝ իշխանություն և իրեն կցված Եվրադաշինք։ Մնացած ընդդիմադիր ուժերը, ովքեր դեմ չեն մեր ծրագրերին, սկզբունքներին ու գաղափարներին՝ յուրաքանչյուրի հետ համագործակցության եզրեր տեսնում ենք»։