Ադրբեջանի ԱԳՆ-ն արձագանքել է ՀՀ ԱԳ նախարար Արարատ Միրզոյանի հայտարարություններին, և մասնավորապես Ադրբեջանի ԱԳՆ մամուլի քարտուղար Այհան Հաջիզադեն հայտարարել է, թե  հայկական կողմը «փոխանակ փորձելու վերացնել այն խնդիրները, որոնք խոչընդոտում են Ադրբեջանի հետ խաղաղության պայմանագրի ստորագրմանը, զբաղված է մանիպուլյացիաներով՝ փորձում է Ադրբեջանին ներկայացնել որպես խաղաղությամբ չշահագրգռված երկիր»։

Հայտարարության մեջ դարձյալ խոսվում է անցած 30 տարիներին «ադրբեջանական հողերը օկուպացնելու, ադրբեջանցիների էթնիկ զտումների մասին»:

Հաջիզադեի խոսքով՝ «Ադրբեջանը երբեք օկուպացիոն քաղաքականություն չի վարել Հայաստանի դեմ և շահագրգռված չի եղել տարածաշրջանը առճակատման գոտու վերածող իրավիճակի ստեղծման մեջ»:

«Անգամ նախարար Միրզոյանի հայտարարությունը, թե Հայաստանը համաձայնել է ընդունել խաղաղության պայմանագրի նախագծի վերջին տարբերակը և ճանապարհ է բացել բանակցություններն ավարտին հասցնելու համար, վկայում է այն մասին, որ վերջին երկուսուկես տարիներին այդ երկիրը խոչընդոտել է գործընթացին»,- հայտարարել է Ադրբեջանի ԱԳՆ մամուլի քարտուղարը և կրկին խոսել ՀՀ Սահմանադրության մեջ առկա՝ իբր «Ադրբեջանի դեմ տարածքային պահանջների և ԵԱՀԿ Մինսկի խումբը պահպանելու փորձերի» մասին։