Իրանը պատրաստ է վերսկսել Միացյալ Նահանգների հետ անուղղակի բանակցությունները, եթե Վաշինգտոնն ընտրի դիվանագիտական ճանապարհը։ Այս մասին հայտարարել է Իրանի արտաքին գործերի նախարար Աբբաս Արաղչին։
«Եթե նրանք ընտրեն ազնիվ դիվանագիտությունը, մենք պատրաստ ենք համագործակցել։ Իսկ եթե մտադիր են խաբել և ռազմական գործողություններ իրականացնել, ապա կստանան ավելի դառը և կոշտ պատասխան, քան նախկինում»,- հայտարարել է Արաղչին։
Նա նաև նշել է, որ Հորմուզի նեղուցի բացման վերաբերյալ Թեհրանի պայմանները չեն փոխվել։
Իրանի ԱԳ նախարարի խոսքով՝ այդ պայմանների ընդունման դեպքում Հորմուզի նեղուցը կբացվի, և բանակցությունները կվերսկսվեն։ Հակառակ դեպքում տարածաշրջանում կպահպանվի ստեղծված իրավիճակը։
Արաղչիի հայտարարությունը հնչել է ԱՄՆ-ի և Իրանի միջև բանակցությունների շարունակման և ռազմական գործողությունների հնարավոր վերսկսման վերաբերյալ քննարկումների ֆոնին։
