ԱԺ-ում շրջանառության մեջ է դրվել  «Քաղաքացիական պայմանագիր» խմբակցության պատգամավոր Անդրանիկ Քոչարյանի վարքագծի վերաբերյալ պատգամավորական էթիկայի հարցերով հանձնաժողով ստեղծելու մասին ԱԺ որոշման նախագիծը, որը հեղինակել են  ԱԺ ընդդիմադիր «Հայաստան»  և «Պատիվ ունեմ» խմբակցությունները։

Civic.am-ը ԱԺ կայքից տեղեկացավ, որ  հիշյալ երկու խմբակցությունների  որոշմամբ հիմնական զեկուցող կնշանակվի ՊՈՒ խմբակցության անդամ, նախկին լրագրող  Թագուհի Թովմասյանը։ Նախագծին կից եզրակացության մեջ, որը տրվել է պատգամավորական էթիկայի հարցերով դիմումներն ուսումնասիրելու և խմբակցություններին եզրակացություններ ներկայացնելու պարտականություն ունեցող մասնագետ, ԱԺ աշխատակազմի իրավաբանական վարչության պետ Մարի Ստեփանյանի կողմից, մասնավորապես նշված է. «Հիմք ընդունելով, որ ուսումնասիրված տեսանյութում հնչեցված արտահայտությունների իրական միտումը և դրանց համատեքստը պարզաբանելու ու օբյեկտիվ գնահատելու անհրաժեշտություն կա, գտնում ենք, որ տեսանյութի հանգամանքները պարզելու և քննարկելու համար կարող է ստեղծվել ժամանակավոր հանձնաժողով»։

Խոսքը ԱԺ-ում մարտի 20-ին Անդրանիկ Քոչարյանի և «Տրիբուն էյ էմ» կայքի լրատվական ծառայության ղեկավար Հռիփսիմե Ջեբեջյանի միջև  տեղի ունեցած երկխոսության տեսագրության մասին է։

Նախագծի հեղինակները կարծում են, որ Անդրանիկ Քոչարյանը ԱԺ միջանցքում ցուցաբերած իր վարքագծով  խախտել է ՀՀ ԱԺ պատգամավորի գործունեության երաշխիքների մասին ՀՀ օրենքի և ՀՀ ԱԺ կանոնակարգ սահմանադրական օրենքի համապատասխան հոդվածների պահանջները, Ջեբեջյանի նկատմամբ ցուցաբերել է «ակնհայտորեն անհարգալից վերաբերմունք»։