«Հանուն Հանրապետության» կուսակցության արտաքին գործերի քարտուղար Առնոլդ Բլեյանի կարծիքով՝ Հայաստանը միակ պետությունը չէ, որի դեմ Ռուսաստանը հիբրիդային պատերազմ է վարում։  

Մյուս բոլոր պետությունները, ըստ մեր զրուցակցի, «մարզված են» և արդեն գիտեն՝ ինչ պետք է անել: «Պարոն Սիմոնյանը նույնպես գիտի՝ ինչ պետք է անել։ Այն բերանը, որով Ռուսաստանը խոսում է ՀՀ քաղաքացիների հետ, պետք է փակվի։ Խոսքը մուլտիպլեքսում հեռարձակվող այն երեք հեռուստաալիքների մասին է, որ չպետք է հեռարձակվեն մեր օրենսդրությամբ։ Դա տեղի է ունենում միջկառավարական համաձայնագրի հիման վրա, բայց այն պետք է չեղարկվի»,-Civic.am-ի հետ զրույցում ասաց Բլեյանը՝ խոսելով ԱԺ նախագահի այն հայտարարության մասին, թե Ռուսաստանը Հայաստանի դեմ հիբրիդային պատերազմ է վարում։

Մեր զրուցակիցը համաձայն է նաև ԱԺ նախագահի այն հայտարարության հետ, թե Ռոբերտ Քոչարյանը Ռուսաստանի շպիոնն է. «ՀՀ քաղաքացիների մեծամասնությունը համաձայն է այդ հայտարարության հետ։ Ես քանիցս այդ մասին հայտարարել եմ, և դա նորմալ է, բայց երբ Ազգային ժողովի նախագահն է այդ մասին հայտարարում, դա նշանակում է, որ հանցագործության մասին հաղորդում է ներկայացվել, և իրավապահ  մարմինները պետք է գնան այդ ուղղությամբ»,-նկատեց նա։

Առնոլդ Բլեյանի դիտարկմամբ՝ պատահական չէ նաև ընտրություններից մեկ տարի առաջ ՌԴ-ի կողմից Հայաստանում իր շահերը սպասարկելու կուրատոր նշանակելը։ Ըստ նրա՝ եթե այսօր իշխանության լինեին նախկին նախագահները, նման կուրատորի կարիք չէր լինի: «Պատկերացնո՞ւմ եք ԱՄՆ-ն այստեղ կուրատոր նշանակեր, որ ընտրություններին որևէ ուժ սպասարկեր Դոնալդ Թրամփի շահերը»,- հարցադրում արեց նա։

Բլեյանը նշեց՝ իշխանության ռեյտինգն էլ ավելի կբարձրանա, եթե գնան կոշտ քայլերի ու փակեն այն բերանները, որոնք խոսում են Հայաստանի պետականության դեմ: «Ընդ որում,  քաղաքացիների հիմնական դժգոհությունն իշխանություններից այն է, որ այն խոսող բերանները, որոնք օրենսդրորեն պետք է 2018-ից դուրս բերվեին քաղաքական դաշտից, դեռ ակտիվ են»,- եզրափակեց նա։

Մարիամ Գրիգորյան

Հարցազրույցն ամբողջությամբ՝ տեսանյութում