Կարեն Դեմիրճյանի անվան մարզահամերգային համալիրում օրերս տեղի ունեցած հարսանյաց միջոցառումը բուռն քննադատության է արժանացել  հանրության կողմից, թե՝ ինչպե՞ս կարելի է այդ հաստատությունը տրամադրել «քեֆ-ուրախություն» իրականացնելու համար։ Նշենք, որ ամիսներ առաջ էլ՝ նախորդ տարի սեպտեմբերի 22-ին, նույն հաստատությունում տեղի ունեցավ, այսպես ասած, «քաղաքական հարսանիք»՝ «Սրբազան պայքար» կոչվող շարժման հավաքը։ Հարկ է նկատել, որ նախքան այդ՝ շարժման առաջնորդ Բագրատ Գալստանյանը մի գլուխ հայտարարում էր, թե համալիրի տնօրենությունը միտումնավոր չի տրամադրում  մեծ դահլիճը՝  պատճառաբանելով, թե նշված օրը պետք է այլ միջոցառում տեղի ունենա։ Որոշ ժամանակ անց, սակայն, դահլիճը տրամադրվեց, հավաքն էլ «բարով-խերով» տեղի ունեցավ։ Ի դեպ, մամուլը (https://www.civic.am/news/77063) գրել էր, որ դահլիճի վարձակալման համար շարժումը վճարել է 10 մլն դրամ (ներառյալ ԱԱՀ-ն)։  Փաստորեն, երբ ընդդիմադիր հավաք է տեղի ունենում համալիրում՝ «օկ» է, իսկ երբ հարսանիք՝ «ամոթ է ու խայտառակություն»։ Ինչպես ասում են՝ ճաշակի ու վերաբերմունքի հարց է։  

Թեմային այսօր անդրադարձել է նաև ՀՀ վարչապետ Նիկոլ Փաշինյանը՝ նշելով՝ անհասկանալի է այն աղմուկը, որ բարձրացել է տեղի ունեցած միջոցառումից հետո։ Կառավարության ղեկավարը նշել է,  թե Համալիրը տարիներով քանդվել-քայքայվել է, միլիարդներ են ներդրվել այն վերականգնելու համար, սակայն  դեռ չեն կարողացել քայքայման պրոցեսը կանգնեցնել։ «Բա պետք է տնտեսվարությամբ զբաղվի, Մարզահամերգային համալիրում ի՞նչ պետք է տեղի ունենա... հարյուրավոր ընտանիքներ գնում Դուբայում հարսանիք են անում հետ են գալիս, իսկ որ այստեղ կարող է սննդի համակարգ աշխատել, երաժիշտները կարող են հավելյալ գումար ստանալ... չէ՛, եկեք ձեռք չտանք, չմոտենանք Համալիրին»,-մասնավորապես հայտարարել է վարչապետը։    

Համալիրը բաղկացած է երկու դահլիճից՝ սպորտային և համերգային։ Առաջին դահլիճը շահագործման է հանձնվել 1983 թ., երկրորդ դահլիճը՝ 1984 թ. հոկտեմբերին։ Վերանորոգվել է 1985-1987 թթ.։  Հաստատությունը հիմնովին նորոգվել է 2007-2008 թթ.: Մարզասրահը և համերգասրահը հյուրընկալել են աշխարհահռչակ մարզիկների, հանրահայտ երգիչների ու երաժիշտների: Այստեղ կայացել են բազմաթիվ համերգներ, բազմաոճ երաժշտական խմբերի ելույթներ:

Հ. Մ.