Հավաքական անվտանգության պայմանագրի կազմակերպության (ՀԱՊԿ) երկրները շարունակում են Հայաստանը համարել միավորման լիիրավ անդամ, սակայն այս կարգավիճակը ենթադրում է կազմակերպության շրջանակներում բոլոր պարտավորությունների պահպանում։ Այս մասին լրագրողներին հայտարարել է Ռուսաստանի արտաքին գործերի նախարար Սերգեյ Լավրովը՝ ՀԱՊԿ արտաքին գործերի նախարարների խորհրդի նիստի արդյունքներով։
«Մենք, ինչպես
նախկինում, Հայաստանը համարում ենք այս կազմակերպության լիիրավ անդամ, սակայն,
իհարկե, լիիրավ անդամակցությունը ենթադրում է մասնակցություն և բոլոր
պարտավորությունների կատարում, որոնք բխում են ՀԱՊԿ կանոնադրական փաստաթղթերից: Ներառյալ,
իմիջիայլոց, անդամավճարների վճարումը»,- ասել է ՌԴ ԱԳ նախարարը։
Միաժամանակ նա նշել
է, որ ՀԱՊԿ արտաքին գործերի նախարարների խորհրդի նիստի մասնակիցները «ի գիտություն
են ընդունել, որ (ՀՀ) արտաքին գործերի նախարարը (Արարատ Միրզոյանը) կրկին հրաժարվել
է մասնակցել միջոցառմանը»։ «Մենք ելնում ենք նրանից, որ մեր պետությունների
ղեկավարները, երբ հանդիպել են ՀԱՊԿ-ի կազմում, նույնպես ի գիտություն են ընդունել
ՀԱՊԿ-ի նկատմամբ Հայաստանի վերաբերմունքի փաստը»,- հավելել է Լավրովը։
Նրա խոսքով՝
Հայաստանի ղեկավարության հայտարարությունները վկայում են այն մասին, որ միտումները
զարգանում են «բազմավեկտոր համատեքստում»։
