ԱԺ «Քաղաքացիական պայմանագիր» խմբակցությունը հուլիսի 2-ին ԱԺ-ում  շրջանառության մեջ է դրել հայտարարության նախագիծ՝ «Բռնության ճանապարհով պետական իշխանությանը տիրանալու անթույլատրելիության և ժողովրդավարության պաշտպանության մասին» վերտառությամբ։  

Հայտարարության մեջ նախագծի հեղինակները խստորեն դատապարտում են ՀՀ ինքնիշխանության, սահմանադրական կարգի և օրինական իշխանությունների դեմ նախապատրաստված ահաբեկչության փորձը, որը բացահայտվեց ՀՀ իրավապահ մարմինների կողմից 2025 թվականի հունիսին։ Նախագծում նշվում է, թե ահաբեկչության և սահմանադրական կարգի տապալմանն ուղղված ցանկացած գործողություն արժանանալու է ամենախիստ պատժի՝ համաձայն ՀՀ Սահմանադրության և օրենքների։ «Ահաբեկչությունը և բռնության ճանապարհով պետական իշխանությանը տիրանալու փորձերը ուղիղ հարված են ՀՀ ինքնիշխանությանը և ժողովրդին։ Դրանք միտված են կազմալուծելու Հայաստանի ժողովրդավարական ինստիտուտները և հարվածելու պետության դիմադրողականությանը՝ ստեղծելով ներքին և արտաքին սպառնալիքներ ՀՀ և ՀՀ ժողովրդի համար»,- ասված է հայտարարության մեջ։ 

ՔՊ-ն  իր հեղինակած նախագծում նաև խիստ  մտահոգիչ և դատապարտելի է համարել  ՀՀ նախկին ղեկավարների և նրանց թիմակիցների՝ ահաբեկչությունն արդարացնող կամ աջակցող հայտարարությունները։ «Նրանք քաղաքական պատասխանատվություն են կրում իրենց գործողությունների համար։ Որևէ պատճառ կամ նեղ քաղաքական նպատակ չի կարող արդարացնել զինված խմբեր ստեղծելու, զենք-զինամթերք, պայթուցիկ նյութեր կուտակելու և երկրում սահմանադրական կարգը տապալելու ծրագրերը»,- կարդում ենք նախագծում։ Դրա հեղինակը առաջարկում է, որ ԱԺ-ն, որպես  առաջնային մանդատով օժտված լեգիտիմ  ներկայացուցչական մարմին, կոչ անի բոլոր քաղաքական ուժերին, քաղաքացիական հասարակության ներկայացուցիչներին և քաղաքացիներին  դատապարտել ահաբեկչությունը և բռնության միջոցով պետական իշխանության զավթման փորձերը,  աջակցել ՀՀ օրինական իշխանություններին  իրենց սահմանադրական պարտականությունների կատարման մեջ, նպաստել ազգային համերաշխությանը և պետական ինստիտուտների ամրապնդմանը։

Նախագծի հիմնական զեկուցողն է ՔՊ խմբակցության ղեկավար Հայկ Կոնջորյանը։