Ռուսաստանը պատրաստ է իր ներդրումն ունենալ Երևանի և Բաքվի միջև հարաբերությունների կարգավորմանը։ Այս մասին հայտնել է ՌԴ փոխարտգործնախարար Միխայիլ Գալուզինը:

Նա կրկին անդրադարձել է ՌԴ, Ադրբեջանի և Հայաստանի ղեկավարների 2020 և 2022 թվականների եռակողմ համաձայնագրերին և նշել հիմնական ուղղությունները:

 «Այդ ուղղությամբ շարժվելու հիմնական ուղղությունները ուրվագծվել են Ռուսաստանի Դաշնության, Ադրբեջանի և Հայաստանի ղեկավարների 2020 և 2022 թվականների եռակողմ համաձայնագրերում։ Մենք կարծում ենք, որ հենց այդ ուղղություններով պետք է շարժվել՝ խաղաղության պայմանագրի նախապատրաստում, տարածաշրջանում տնտեսական կապերի և տրանսպորտային հաղորդակցությունների ապաշրջափակում, սահմանների դելիմիտացիա, որին կհետևի դեմարկացիան, երկխոսության հաստատում Հայաստանի ու Ադրբեջանի քաղաքացիական հասարակությունների և խորհրդարանների միջև։ Եվ, իհարկե, ռուսական կողմը՝ որպես եռակողմ համաձայնագրերի մասնակիցներից մեկը, պատրաստ է հետագայում ևս իր ներդրումն ունենալ դրանց իրագործմանը։ Բնականաբար, այն ձևով, որը հարմար կլինի երկու կողմերին»,- նշել է ՌԴ ԱԳ փոխնախարարը։