ԱԺ ՔՊ խմբակցության պատգամավոր Մարիա Կարապետյանը ֆեյսբուքյան իր էջում գրել է․
Մոտ մեկ ամիս առաջ Սամվել Կարապետյանը 35 վայրկյանանոց իր հարցազրույցում ասաց․ «Ի՞նչ կարծիք ես պետք է ունենամ, եթե մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու, հայ ժողովրդի վրա: Քանի որ ես միշտ եղել եմ հայոց եկեղեցու կողքին ու հայ ժողովրդի կողքին, ունենալու եմ անմիջական մասնակցություն: Եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու այդ ամեն ինչին:»:
Սամվել Կարապետյանի փաստաբանը մեկնաբանեց․ «Կարապետյանը այն կարծիքին է, որ դա ընդամենը երկու կողմերի միջև եղել է հաշտության կոչ։ Եթե հաշտության չգան, իր միջոցներով կփորձի երկու կողմերին բերել հաշտության։»:
Իհարկե դատարանը որոշում կկայացնի Սամվել Կարապետյանի հետագա ճակատագրի մասին։ Մենք պարզապես արձանագրենք, որ բոլոր առյուծ կտրածները Հայաստանի Հանրապետության դատաիրավական համակարգին հանդիպելիս մուկ են դառնում:
Սակայն Սամվել Կարապետյանի 35 վայրկյանանոց հարցազրույցը ամբողջությամբ մեջբերեցի այլ հանգամանքի պատճառով։ Հայ Առաքելական Եկեղեցին, որ Հայաստանի Հանրապետության ստեղծումից հետո պիտի վերանայեր կայսրությունների օրոք թրծված իր լեզվամտածողությունը, Սամվել Կարապետյանին անվանում է «ազգային բարերար»՝ մի ողջ ազգի բարերար։ Հայ Առաքելական Եկեղեցու քաղաքական մտքի աշակերտ Սամվել Կարապետյանն էլ ասում է․ «Ես միշտ եղել եմ հայ ժողովրդի կողքին»։
Ի՜նչ աստիճանի թշվառ ու կարիքավոր է երևակայվում ազգն ու ժողովուրդը այս քաղաքական մտածողության մեջ։ Եւ ինչերի՜ են պատրաստ այս մարդիկ սեփական ազգին ու ժողովրդին նորից թշվառության ու կարիքի դատապարտելու համար, միայն թե դրա վրա հենվելով պահպանեն և կամ վերականգնեն իրենց իշխանությունը՝ տնտեսական իշխանությունը, քաղաքական իշխանությունը, Հայաստանի ժողովրդի ու հայ ազգի անունից խոսելու իշխանությունը։
Հաշտություն լինելու է։ Ավելին՝ հնազանդություն է լինելու։ Հայաստանի Հանրապետությանը և նրա ժողովրդի կարգին ու օրենքին։
