Հայաստանի ֆինանսավորումն ավելացնելու ԵՄ խոստումը ստրկացման դասական ժանրից է, մինչդեռ Ռուսաստանը չի պատրաստվում նայել Երևանի գրպանը, քանի որ «դա նրանց հարաբերություններն են եվրոպական ինստիտուտների հետ»։ Այս մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
Ավելի վաղ Եվրոպական խորհրդի նախագահ Անտոնիու Կոշտայի և Եվրոպական հանձնաժողովի նախագահ Ուրսուլա ֆոն դեր Լյայենի հետ ՀՀ վարչապետ Նիկոլ Փաշինյանի հանդիպումից հետո ԵՄ-ն խոստացել է Global Gateway ռազմավարության շրջանակներում Հայաստանում ներդրումների ծավալը հասցնել 2,5 միլիարդ եվրոյի և 1,5 միլիոն եվրո հատկացնել անկախ լրատվամիջոցներին:
«Սա դասական ժանր է Եվրոպական
հանձնաժողովի, ԵՄ-ի և ՆԱՏՕ-ի համար՝ շռայլ խոստումներ տալ, ապա այդ ֆինանսական
խոստումների սոուսի տակ ստրկացնել գործընթացներով՝ հանելով փրփուրը և ստանալով
օգուտներ», - ասել է Զախարովան։
Նրա խոսքով՝ ԵՄ-ն նույն օգնությունը մի
քանի անգամ հաշվում է, տարբեր մեքենայություններ է նախաձեռնում, խոստանում է մի
բան, տալիս երկու անգամ քիչ կամ ընդհանրապես ոչինչ չի հատկացնում։
Զախարովան նշել է,
որ տնտեսական օգնությունը վաղուց դարձել է ԵՄ-ի համար լծակ՝ ազդելու երրորդ
երկրների քաղաքականության վրա և միջամտելու նրանց ներքին գործերին։
