Մոսկվայի և Բաքվի միջև հարաբերություններում «բարդ շրջան է» սկսվել, Կրեմլը, սակայն, հույս ունի, որ այն կանցնի։ Այս մասին լրագրողների հետ ճեպազրույցում հայտարարել է Ռուսաստանի նախագահի մամուլի քարտուղար Դմիտրի Պեսկովը։

Ռուսաստանի և Ադրբեջանի միջև հարաբերություններն ունեն ամուր հիմք, «բայց երբեմն պատահում է», որ այդ հարաբերություններում «տեղի են ունենում բարդ շրջաններ», և հիմա այդ շրջաններից մեկն է, հայտարարել են Կրեմլում, փոխանցում է РБК-ն։

«Մենք հույս ունենք, որ այս ժամանակաշրջանը կանցնի, մենք կարծում ենք, որ երկու երկրների միջև համագործակցությունն իսկապես փոխադարձ օգուտ է բերում: Մեզ համար շատ կարևոր է, որ Ադրբեջանում ռուս (ժողովրդին) հարգեն: Ռուսաստանում ապրում է շատ մեծ ադրբեջանական սփյուռք: Սփյուռքի գրեթե բոլոր ներկայացուցիչները մեր օրինապահ քաղաքացիներն են, որոնք այստեղ արժանի հարգանք են վայելում: Այն քաղաքացիները, որոնք խախտում են օրենքները, հետապնդվում են օրենքով»,- վստահեցրել է Պեսկովը:  

Կրեմլի ներկայացուցիչը նաև հայտարարել է, որ եթե Ադրբեջանը որոշի դատի տալ Ռուսաստանին՝ կապված AZAL ուղևորատար ինքնաթիռի խոցման հետ, Մոսկվան կսպասի պաշտոնական վճիռներին։ «Քննչական գործողություններ են ընթանում, ընթանում է դատաքննություն։ Եթե Ադրբեջանը նման որոշում կայացնի, դա Ադրբեջանի իրավունքն է, մենք կսպասենք պաշտոնական դատավճիռներին»,- ասել է Պեսկովը։