Միխայիլ Գուսմանը հեռացվել է ՏԱՍՍ-ի գլխավոր
տնօրենի առաջին տեղակալի պաշտոնից։ Այս մասին ասվում է ՌԴ վարչապետ Միխայիլ
Միշուստինի կողմից ստորագրված որոշման մեջ։
«Միխայիլ Սոլոմոնովիչ Գուսմանին ազատել դաշնային
պետական ունիտար ձեռնարկության Ռուսաստանի «Տեղեկատվական հեռագրային գործակալության
(ԻՏԱՌ-ՏԱՍՍ)» գլխավոր տնօրենի առաջին տեղակալի պաշտոնից», - ասվում է փաստաթղթում։
Հուլիսին
Գուսմանը եղել է Շուշիի մեդիաֆորումում,
որին մասնակցել է Ադրբեջանի նախագահ Իլհամ Ալիևը: Լրատվամիջոցների տեղեկություններով՝ լրագրողը հետաքրքրվել է, թե ինչպես է Ալիևը կարողանում վարել եզակի արտաքին քաղաքականություն բոլոր ուղղություններում:
Ինչպես փոխանցում է EADaily-ն,
ռազմական բլոգեր Սերգեյ Կոլյասնիկովը ուշադրություն է հրավիրել այն բանի վրա, թե
ինչպես են Շուշիի ֆորումում Ռուսաստանի ներկայացուցիչները հաճոյախոսություններ
հղել Ադրբեջանի նախագահ Իլհամ Ալիևի հասցեին, որը դեմարշ է արել Ռուսաստանի դեմ:
Կոլյասնիկովին վրդովել են քաղաքագետ Սերգեյ Մարկովի և լրագրող Միխայիլ Գուսմանի
մեկնաբանությունները:
