Սյունիքի մարզով հաղորդակցության ուղիների ապաշրջափակման դեպքում պետք է հաշվի առնել ռուս սահմանապահների ներկայությունը։ Այս մասին ճեպազրույցի ժամանակ հայտարարել է Ռուսաստանի ԱԳՆ տեղեկատվական քաղաքականության դեպարտամենտի փոխտնօրեն Ալեքսեյ Ֆադեևը՝ ի պատասխան օգոստոսի 8-ին Վաշինգտոնում Հայաստանի, ԱՄՆ-ի և Ադրբեջանի առաջնորդների կողմից ստորագրված եռակողմ հռչակագիրը մեկնաբանելու խնդրանքի։

Նա նշել է, որ Ռուսաստանը արդիական է համարում Ռուսաստանի, Հայաստանի և Ադրբեջանի առաջնորդների 2020-22 թվականների եռակողմ պայմանավորվածությունները, քանի որ կողմերից ոչ մեկը չի հայտարարել այդ պայմանավորվածություններից դուրս գալու մասին։

ԱԳՆ և Ռուսաստանի ղեկավարությունը մեկ անգամ չէ, որ հայտարարել են՝ Մոսկվան պատրաստ է գործընկերներին օգնություն ցուցաբերել հարաբերությունների կարգավորման հարցում:

Ինչ վերաբերում է «Թրամփի երթուղուն», ապա Ռուսաստանի արտաքին քաղաքական գերատեսչությունը զերծ է մնացել իր կարծիքից այնքան ժամանակ, քանի դեռ չի ուսումնասիրել դեռևս չհրապարակված նախագծի մանրամասները:

«Ինչպես մենք ավելի վաղ նշել էինք, Հարավային Կովկասում արտատարածաշրջանային ուժերի ներգրավումը պետք է առաջ մղի խաղաղության օրակարգը, ոչ թե ստեղծի նոր խնդիրներ և բաժանարար գծեր։ Մենք նաև նշել ենք, որ անհրաժեշտ է հաշվի առնել Հայաստանի անդամակցությունը ԵԱՏՄ-ին և ռուս սահմանապահների ներկայությունը Սյունիքի մարզում։ Կարծում ենք, որ սա պետք է հաշվի առնվի նախագծի մանրամասները մշակելիս»,- ասել է Ֆադեևը։