Ինչպես հայտնել էինք, վարչապետ Նիկոլ Փաշինյանը և Հանրապետության նախագահ Վահագն Խաչատուրյանը ներկա են գտնվել օտարերկրյա պետություններում ՀՀ դիվանագիտական ներկայացուցչությունների ղեկավարների տարեկան աշխատաժողովի մեկնարկին:
Վարչապետը հանդես է եկել ելույթով՝ կարևորելով դիվանագիտական ներկայացուցչությունների առանցքային դերն ու նշանակությունը։ Իր խոսքում վարչապետ Փաշինյանն անդրադարձել է ՀՀ կառավարության կողմից իրականացվող բալանսավորված և բալանսավորման արտաքին քաղաքականությանը:
Վարչապետը սոցցանցերի իր էջերում հրապարակել է իր խոսքից մի հատված, որում նշում է.
«Մեր ամենամեծ խնդիրներից մեկն էլ եղել է այն, որ տեսությունները, որոնցով մեր երկիրն ապրել է, սովորաբար ձևավորվել են էլիտաների կողմից և ուսուցանվել են հանրությանը:
Մենք հիմա ապրում ենք ժամանակներում, երբ հակառակն է տեղի ունենում: Տեսությունները խմորվում են ժողովրդի գիտակցության մեջ, հետո ժողովրդի ներկայացուցիչների կողմից ձևակերպվում են և իրականացվում:
Շատ կարևոր է, որ մենք ամբողջությամբ պահենք էս պրոցեսի օրգանիկությունը»:
