Կոռուպցիայի կանխարգելման հանձնաժողովը հրապարակել է Հայ Հեղափոխական Դաշնակցություն կուսակցության  2024 թ. տարեկան հաշվետվությունը։ Civic.am-ը ԿԿՀ կայքից տեղեկացավ, որ հաշվետու տարում  ՀՅԴ-ն միլիոնավոր դրամների պետական ֆինանսավորում է ստացել։ Մասնավորապես օրենքով սահմանված կարգով բյուջետային ֆինանսավորումը կազմել է 108 մլն 344 հազար դրամ, պետական ընդհանուր ֆինանսավորումը կազմել է 75 մլն 700 հազար դրամ, պետական նպատակային ֆինանսավորումն էլ կազմել է 32 մլն 644 հազար դրամ։ Կուսակցության նվիրատվությունը, ի համեմատ վերոհիշյալ ֆինանսավորումների, շեշտակի նվազ է՝ ընդամենը 1 մլն 936 հազար 408 դրամ (ընդամենը 1 նվիրատու՝ Սարգիս Բաղդասարյան)։ Անշարժ գույքի կառավարումից ստացած մուտքերը կազմել են 3 մլն 500 հազար դրամ, այլ մուտքերը՝ 3 մլն 450 հազար դրամ։ Ընդհանուր մուտքերը, ըստ հաշվետվության, կազմել են 117 մլն 280 հազար 408 դրամ։

Հարկ է նշել, որ կուսակցության ելքերը գերազանցում են մուտքերին՝ ընդհանուր 137 մլն 948 հազար 65 դրամ, որից մասնավորապես 13 մլն 829 հազար դրամը՝ աշխատանքի վարձատրության և դրան հավասարեցված այլ վճարներն են, քաղաքացիաիրավական պայմանագրերի հիման վրա ծառայությունների մատուցման վճարները։

Կուսակցությունն ընդհանուր առմամբ 72 անշարժ գույք է հայտարարագրել՝ հողամասեր, հասարակական նշանակության շինություններ, բազմաբնակարան շենքի ոչ բնակելի տարածքներ և այլն։

Նշենք, որ ՀՅԴ կուսակցությունը հիմնադրվել է 1890թ., ՀՀ-ում պետական գրանցում է ստացել 2003 թվականին։  Թե քանի անդամ ունի 2024-ի դրությամբ 134-ամյա կուսակցությունը՝ հաշվետվության մեջ չի նշվել։ Նկատենք, որ 2023 թ. հաշվետվության մեջ նշված էր, որ 2023 թվականի դեկտեմբերի 31-ի դրությամբ կուսակցությունն ունեցել է 5100 անդամ։ Կուսակցությունն ունի 11 տարածքային ստորաբաժանում Երևանում և ՀՀ տարբեր մարզերում, որպես դրանց գործունեության մեկնարկ նշված է 2022 թվականը։  

Նկատենք, որ ըստ IRI-ի հուլիսին հրապարակված հարցման տվյալների՝ ՀՅԴ հանրային վարկանիշը ընդամենը 1 տոկոս է՝ այդքան մարդ կքվեարկեր ՀՅԴ-ի օգտին, եթե ընտրությունները լինեին առաջիկա կիրակի։

Հ. Մ.