Վերջապես պետք է սկսել սովորել մեր թշնամիներից ու Լաչինի անցագրային կետի օրինակով օր առաջ երկուական նմանատիպ կետ բացել Ադրբեջանի արևմտյան ու Նախիջևանի սահմաններին․ նախկին պատգամավորի առաջարկը

ԱԺ «Իմ քայլը» խմբակցության նախկին պատգամավոր Էդգար Աառաքելյանը ֆեյսբուքի իր էջում մասնավորապես գրել է․
 
«Լինել պրոակտիվ, այլ ոչ ռեակտիվ, դրսևորել հնարամտություն ու ճկունություն:
 
Հիմա Հայաստանը պարտավոր ա կոնսոլիդացնել իր ինտելեկտուալ ողջ պոտենցիալը ու կանխատեսելով մեր թշնամիների հետագա գործողությունները, միշտ մի քայլ առաջ լինել: Էդ համատեքստում ես իմ լուման եմ ներդնում` հանդես գալով շատ կարևոր առաջարկով:
Արցախում կատարվածից հետո հաջորդ մեծ սպառնալիքը, որ կախված ա Հայաստանի գլխին, այսպես կոչված, Զանգեզուրի արտատարածքային միջանցքն ա: Դա ստանալու համար ռուս-ադրբեջանա-թուրքական դաշինքը նախ կփորձի կրկնել ղարաբաղյան վերջին օպերացիան` հեղաշրջման միջոցով իշխանության բերելով իրեն հնազանդ քաղաքական ուժերին, (իսկ եթե իրերն իրենց անունով կոչենք` գործիք/գործակալներին), որոնք ադրբեջանական փոքր ռազմական գործողությունից հետո սիրահոժար կերպով կհամաձայնվեն ընդունել հերթական «ռուսական առաջարկը»` ստորագրելով միջանցքի տրամադրման փաստաթղթի տակ և փաստացի ՀՀ-ին զրկելով ինքնիշխանությունից: 
 
Արդեն ուրվագծվում ա 5-րդ շարասյան նոր սերունդը, որին պատկանող թարմ գործիչները նախկինում պետական պաշտոններ չեն զբաղեցրել, քաղաքական վարկաբեկված կուսակցությունների անդամ չեն եղել ու քաղաքականապես բավականին պատրաստված են` էսօրվա հրապարակի հարթակը: Եթե իշխանությունը ինչ-որ էքստրա-մեգա հիմարություններից խուսափի, էս ուժերի` խաղաղ ճանապարհով իշխանափոխություն անելու մեծ շանսեր ես չեմ տեսնում: 
 
Նրանք միևնույն ա հասարակության մեծ մասի մոտ ասոցացվելու են նախկինների ու ռուսների հետ և մերժվելու են կամ բավարար աջակցություն չեն ստանալու: Խորհուրդ կտայի, որ Մոսկվան ու իր հայաստանյան մանկլավիկները Երևանի ընտրությունների արդյունքներից շատ չոգևորվեին իրենց վերլուծություններում:

Մյուս տարբերակն իհարկե բռնի իշխանափոխությունն ա, որի ակնարկը Մեդվեդևի հայտնի գրառման մեջ կար: 
 
Կդժվարանամ մեկնաբանել` արդյոք դա բլեֆի կամ շանտաժի ժանրից ա, թե՞ իրոք ոչ մի բանի առաջ կանգ չեն առնելու: Դա նաև կախված կլինի Փաշինյանի իրական վարկանիշից ու լեգիտիմությունից:
Ու իհարկե շատ քննարկված երրորդ տարբերակը` իրական ռազմական գործողություններ ՀՀ դեմ ներկա վարչակարգի օրոք և միջանցքի բացում ուժի/օկուպացիայի միջոցով: 
 
Հայաստանի իշխանություններն իհարկե կարող են պարապ նստել ու սպասել, թե էս սցենարներից ի վերջո որ մեկն իրականություն կդառնա (հիշեցնեմ, որ շահառուն 230 միլիոն բնակչությամբ ու գերհզոր ռազմական/պետական մեքենայով երեք հիշյալ երկրներն են), կարող ա անվերջ զանգեր անել ստեղ-ընդեղ, կարող ա անգամ ՀԱՊԿ-ից դուրս գալ, ստատուտ վավերացնել, բայց որ իրական աղետը չոքեց դռանը, էլի անօգնական ենք մնալու: 


Հետևաբար առաջարկս հետևյալն ա․
 
Վերջապես սկսել սովորել մեր թշնամիներից ու Լաչինի անցագրային կետի օրինակով օր առաջ երկուական նմանատիպ կետ բացել Ադրբեջանի արևմտյան (ենթադրենք` Սոթքում ու Կոռնիձորում) ու Նախիջևանի (ենթադրենք` Երասխում ու Սիսիանում) սահմաններին: 
Հայտարարել, որ դրանք հենց առաջին օրվանից բաց են Ադրբեջանի քաղաքացների համար ու քանի դեռ Ադրբեջանը թշնամական քայլերի չի գնում, Հայաստանը երաշխավորում ա դրանով ազատ ելքն ու մուտքը անգամ մինչև խաղաղության պայմանագրի ստորագրումը: Սկզբնական շրջանում որպես բարի կամքի դրսևորում կարաք բոլորին թույլատրեք` պայմանով, որ նույն օրը, ասենք` 4 ժամվա ընթացքում, մյուս կողմից պետք ա լքեն Հայաստանը, հակառակ դեպքում կձերբակալվեն ու կարտաքսվեն` առանց հեագայում երկիր մուտք գործելու իրավունքի:
 
Առանց ինչ-որ հատուկ ռեժիմներ համաձայնեցնելու, առանց փոխվարչապետների եռակողմ հանձնաժողովների և այլնի: Ուղղակի սահմանը միակողմանի բացել ու ֆորմալ կատարել էդ 9-րդ կետը: Եթե կատարված համարվելու համար անհրաժեշտ կլինի, որ ադրբեջանական շարասյուներին ուղեկցեն ռուսական ФСБ-ի մեքենաներ, դա էլ հայտարարեք, միևնույն ա վաղը որ պահին իրավիճակը թույլ տվեց, հանգիստ կարելի ա էդ ռեժիմը չեղարկել: 

Կրկնում եմ, ու շան գլուխն էստեղ ա թաղված` առանց որևէ նոր ղազագիր ստորագրելու, առանց Հայաստանի յուրիսդիկցիան կասկածի տակ դնելու, առանց նոր զոհերի, տարածքային կորուստների: Զուտ դրեք ֆորմալ կատարեք էդ կետը, մի նայեք, թե ձեզանից ինչ կամ ոնց են պահանջում: Պարտադիր չի, որ էդ ճանապարհներն իրականում աշխատեն, դրանցով մարդիկ գնան-գան: Դուք ձերը հայտարարեք, կազուս բելլին էդ մասով ժամանակավորապես չեզոքացրեք: Կգան, նոր պահանջներ կդնեն, ասեք տենց բան չենք ստորագրել, ինչքան ստորագրել ենք, էդքանի տերն ենք: Ու մաքսիմալ տեղեկատվական-քարոզչական ֆոն ապահովեք, ակտիվորեն աշխատեք արտաքին գործընկերների հետ, էս արածը շատ թանկ գնով փորձեք վաճառել: Խեղճի, հարիֆի, տկարի վիճակներից դո՛ւրս էկեք, գործե՛ք:
Սա չարեցիք, էլի կոտրած տաշտակի առաջ ենք կանգնելու»: