«Լաչինի միջանցքի փակման վերաբերյալ Հայաստանի պնդումները բացարձակապես կեղծ են». Ալիևը՝ Ադրբեջանում Ֆրանսիայի նոր դեսպանին

Վերջին ժամանակերս Հայաստանը «անհիմն» պնդումներ է անում «Ադրբեջանի տարածքում» Լաչին-Ստեփանակերտ ճանապարհի փակման մասին, այդ մեղադրանքները «բացարձակապես կեղծ են և անհեթեթ», Բաքվում Ֆրանսիայի նոր դեսպան Անն Բուայոնի հետ հանդիպմանն ասել է Ադրբեջանի նախագահ Իլհամ Ալիևը։

Ալիևը դեսպանին տեղեկացրել է, որ վերոնշյալ ճանապարհով «ապահովվում է քաղաքացիական նշանակության բեռների և քաղաքացիական անձանց տեղափոխումը ռուս խաղաղապահների և Կարմիր խաչի միջազգային կոմիտեի միջոցով»: Նա մասնավորապես ընդգծել է, թե դեկտեմբերի 12-ից ի վեր այդ ճանապարհի երկու ուղղություններով փոխադրվել է գրեթե 1000 տրանսպորտային միջոց։

Ալիևը նաև նշել է «ադրբեջանական տարածքներում», որտեղ ժամանակավորապես տեղակայված են ռուս խաղաղապահներ, օգտակար հանածոների հանքավայրերի «ապօրինի» շահագործումը դադարեցնելու և Ադրբեջանի կողմից այդ հանքավայրերում մշտադիտարկում ապահովելու կարևորությունը։