Անհետ կորած զինվորը գտնվել է․ Նա վիրավոր է, վիճակը ծայրահեղ ծանր է․ Գնել Սանոսյան

Անհետ կորած զինվորը գտնվել է՝ ծանր վնասվածքներ ունի, քիչ հետո կտեղափոխեն Երևան։ Այս մասին Civic.am-ի հետ զրույցում ասաց Գեղարքունիքի մարզպետ Գնել Սանոսյանը։ Նա հավելեց նաև, որ անհետ կորած զինվորը ժամկետային զինծառայող է․ «Ներկայումս գտնվում է ծայրահեղ ծանր վիճակում, Վարդենիսում առաջին անհրաժեշտության միջամտություններն արել են, քիչ անց կտեղափոխեն Երևան»։

Գնել Սանոսյանի խոսքով՝ կրակոցները 10։40-ից դադարեցվել են՝ այժմ հրադադար է,  բնակիչների մեջ խուճապ չկա։

Գեղարքունիքի մարզպետը հիշատակեց, որ հայկական կողմն ունի 3 զոհ, 4 վիրավոր։ 

Հիշեցնենք, որ ՀՀ ՊՆ-ն այսօր հաղորդագրություն տարածեց, համաձայն որի՝ Ադրբեջանը Ռուսաստանի Դաշնության մայրաքաղաք Մոսկվայում նախատեսվող բանակցություններից առաջ նախահարձակ մարտական գործողություններ է սկսել Հայաստանի Հանրապետության սահմանների վրա՝ Սոթքից մինչև Վերին Շորժա հատվածում։ Ծավալվել են մարտական գործողություններ, ընթանում է ինտենսիվ փոխհրաձգություն։