Նորատուսում վիճաբանությունն ավարտվել է կրակոցներով. կրակել են հրացանից և մարմնական վնասվածք պատճառել համագյուղացիներին

Հոկտեմբերի 6-ին, ժամը 22.25-ին, «Գավառ» բժշկական կենտրոնից հաղորդում է ստացվել, որ իրենց մոտ վիրավոր քաղաքացու են տեղափոխել: Հիվանդանոց մեկնած օպերատիվ խումբը պարզել է, որ 42-ամյա տղամարդը հրազենային վնասվածքներով հիվանդանոց է տեղափոխվել Նորատուս գյուղից: «Փաստինֆո»-ի հաղորդմամբ՝ այս մասին տեղեկացնում է ՀՀ ոստիկանության Հասարակայնության հետ կապերի և լրատվության վարչությունը։ 

«Ոստիկանության Գեղարքունիքի մարզային վարչության և Գավառի բաժնի ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ հիվանդանոց տեղափոխված տղամարդու և 39 տարեկան երկու համագյուղացիների միջև գյուղի Կայի Դիք կոչվող տարածքում վիճաբանություն և ծեծկռտուք է եղել, որի ընթացքում էլ նրանցից մեկը ողորկափող որսորդական հրացանից կրակոց է արձակել՝ մարմնական վնասվածքներ պատճառելով համագյուղացիներին: 42-ամյա տղամարդը տեղափոխվել է հիվանդանոց, իսկ 39-ամյա տղամարդը բուժօգնության չի դիմել:

Ոստիկանների բացատրական աշխատանքի արդյունքում համագյուղացիներին մարմնական վնասվածք պատճառած տղամարդը ներկայացել է ոստիկանության Գավառի բաժին՝ ներկայացնելով իր անվամբ հաշվառված որսորդական ողորկափող հրացանը և կատարվածի վերաբերյալ տվել է խոստովանական բացատրություն: Նշանակվել են փորձաքննություններ: Կատարվում է նախաքննություն»,-հայտնում են ՀՀ ոստիկանությունից: