Թվայնացման նպատակով աշխատանքային գրքույկները ներկայացնելու ժամկետն ավարտվում է դեկտեմբերի 30-ին

Հասարակություն

17:51, 15 октябрь 2021

Միասնական սոցիալական ծառայությունը հիշեցնում է, որ աշխատանքային գրքույկները թվայնացման նպատակով Ծառայության տարածքային բաժիններ ներկայացնելու ժամկետն ավարտվում է 2021 թ. դեկտեմբերի 30-ին:

Գրքույկները Միասնական սոցիալական ծառայության տարածքային բաժիններ (այսուհետ՝ Ծառայություն) ներկայացնելու ժամկետները՝

1000 և ավելի աշխատող ունեցող գործատուները` սույն ծանուցումը ստանալուց հետո երեք ամսվա ընթացքում.

300-1000 աշխատող ունեցող գործատուները՝ սույն ծանուցումը ստանալուց հետո վեց ամսվա ընթացքում.

100-300 աշխատող ունեցող գործատուները՝ սույն ծանուցումը ստանալուց ինն ամսվա ընթացքում.

50-100 աշխատող ունեցող գործատուները՝ սույն ծանուցումը ստանալուց հետո տասներկու ամսվա ընթացքում.

մինչև 50 աշխատող ունեցող գործատուները՝ սույն ծանուցումը ստանալուց հետո տասնհինգ ամսվա ընթացքում:

Մինչև աշխատանքային գրքույկները Ծառայություն ներկայացնելն անհրաժեշտ է աշխատանքային գրքույկի հայերեն և ռուսերեն լրացված ենթաբաժինների գրառումների վերջին տողից հետո նշել լրացված բոլոր էջերի թիվը, ստորագրել և կնքել (առկայության դեպքում) երկու ենթաբաժինները՝ նշելով աշխատանքային գրքույկը լրացնող անձի զբաղեցրած պաշտոնը, անունը, ազգանունը:

Կատարված փոփոխությունների համաձայն աշխատանքային գրքույկները չներկայացրած գործատուների վրա գրքույկները ներկայացնելու պարտականությունը կարող է դրվել դատական կարգով: