Օսլոյում հայտարարվել է, թե ով է 2025 թվականի Խաղաղության Նոբելյան մրցանակի դափնեկիրը։ Մրցանակը շնորհվել է Մարիա Կորինո Մաչադոյին՝ «Վենեսուելայի ժողովրդի ժողովրդավարական իրավունքները պաշտպանելու անխոնջ աշխատանքի և պայքարելու համար, որ բռնապետությունից ժողովրդավարություն անցումը լինի արդար և խաղաղ»։

Մաչադոն եղել է Վենեսուելայի խորհրդարանի անդամ, 2012 թվականին նա հավակնել է նախագահի պաշտոնին։ 2014 թվականին եղել է նախագահ Նիկոլաս Մադուրոյի կառավարության դեմ բողոքի ցույցերի առաջնորդներից մեկը։ 2024 թվականին Մաչադոն, մնալով Վենեսուելայում, բայց ստիպված լինելով թաքնվել, դարձել է Անդրեյ Սախարովի անվան «Մտքի ազատության համար» մրցանակի դափնեկիր, որը շնորհում է Եվրախորհրդարանը։ Մրցանակը Մաչադոյի հետ կիսել է մեկ այլ վենեսուելացի ընդդիմադիր քաղաքական գործիչ՝ Էդմունդո Գոնսալեսը։

 Նշենք, որ ԱՄՆ նախագահ Դոնալդ Թրամփը շատ էր ձգտում արժանանալու Խաղաղության Նոբելյան մրցանակին: Ինչպես հայտնել է Bloomberg-ը, Թրամփն ասել է, որ եթե մրցանակն իրեն չտրվի՝ դա «մեծ վիրավորանք կլինի մեր երկրի համար»: