ԱՄՆ նախագահ Դոնալդ Թրամփը հայտարարել է, որ Ուկրաինան ցանկանում է անցնել հարձակման։

«Ես որոշում կկայացնեմ այդ հարցի վերաբերյալ, բայց նրանք կցանկանային անցնել հարձակման, և մենք պետք է որոշում կայացնենք»,- ասել է Թրամփը Սպիտակ տանը մամուլի ասուլիսում։

Հարցին, թե արդյոք ԱՄՆ-ն քննարկո՞ւմ է Ուկրաինային որևէ այլ զենք փոխանցելու հնարավորությունը՝ բացի «Տոմահավկ» հրթիռներից, Թրամփը պատասխանել է, որ ուսումնասիրում է «այլ տարբերակներ»։

«Ես պետք է որոշում կայացնեմ այդ առումով»,- ընդգծել է Սպիտակ տան նախագահը։

Ամերիկացի առաջնորդի խոսքով՝ Ուկրաինայի նախագահ Վլադիմիր Զելենսկու հետ հոկտեմբերի 17-ին նախատեսված հանդիպմանը ինքը մտադիր է քննարկել ռուս-ուկրաինական պատերազմը։ Սակայն Թրամփը չի կոնկրետացրել, թե հիմնականում ինչի մասին է խոսվելու։

Նա հավելել է, որ Ռուսաստանը Ուկրաինայի հետ պատերազմում կորցրել է 1,5 միլիոն մարդ, հիմնականում՝ զինծառայողներ։

«Ռուսաստանը պետք է հաղթեր այս պատերազմում առաջին իսկ շաբաթում, իսկ այն արդեն շարունակվում է չորս տարի»,- ասել է Թրամփը։

Նա նաև դիմել է Ռուսաստանի նախագահ Վլադիմիր Պուտինին. «Դադարեցրո՛ւ սպանել ուկրաինացիներին և դադարեցրո՛ւ ռուսներին սպանել»։