Քեմփ Փենդլթոնում Ծովային հետևակի կորպուսի 250-ամյակին նվիրված ցուցադրական հրաձգության ժամանակ 155 մմ տրամաչափի արկերից մեկը պայթել է Interstate 5 մայրուղու վրա, որտեղով անցնում էր ԱՄՆ փոխնախագահ Ջեյ Դի Վենսի ավտոշարասյունը, հաղորդում է The New York Times-ը։

Ճանապարհային պարեկության հաշվետվության տեղեկություններով՝ բեկորները վնասել են Վենսի ուղեկցորդներից մեկի մոտոցիկլետը և պարեկային մեքենան, տուժածներ չկան։ Անհաջող կրակոցն արձակվել է ճանապարհից մոտ մեկ կիլոմետր հեռավորության վրա գտնվող Ուայթ Բիչից, ոստիկանները կայանել էին այնտեղ՝ փոխնախագահի ավտոշարասյունը միջոցառմանը ուղեկցելուց հետո։

Վաղաժամ պայթյունից հետո ցուցադրական հրաձգությունը դադարեցվել է: Պարեկները ստուգման ընթացքում մայրուղում որևէ բեկոր կամ այլ վտանգավոր առարկաներ չեն հայտնաբերել, և ճանապարհը շուտով բացվել է երթևեկության համար:

Կալիֆոռնիայի նահանգապետ Գևին Նյուսոմը քննադատել է նման զորավարժություններ մայրուղու մոտ անցկացնելու գաղափարը։ «Հաջորդ անգամ փոխնախագահը և Սպիտակ տունը պետք է ավելի մեծ պատասխանատվություն ցուցաբերեն և մարդկանց կյանքեր չվտանգեն հանուն ուժի կասկածելի ցուցադրության»,- ասել է նա։

Ի պատասխան՝ Վենսի ներկայացուցիչները Նյուսոմին մեղադրել են ռիսկերը չափազանցելու մեջ։