ԱՄՆ նախագահ Դոնալդ Թրամփը հայտարարել է, որ պետք է Ռուսաստանի
առաջնորդ Վլադիմիր Պուտինը պատերազմը դադարեցնի, այլ ոչ թե փորձարկի միջուկային հրթիռներ։
Թրամփի մեկնաբանությունը հնչել է Պուտինի հայտարարությունից հետո
առ այն, որ «հաջողությամբ փորձարկվել է» միջուկային շարժիչով զինված «Բուրեվեստնիկ»
թևավոր հրթիռը։ Ռուսական կողմը պնդում է, որ հրթիռը օդում է գտնվել մոտ 15 ժամ և հաղթահարել
է մոտ 14 հազար կիլոմետր։
«Նրանք
գիտեն, որ մենք ունենք ատոմային սուզանավ՝ աշխարհում ամենահզորը՝ անմիջապես իրենց
ափերի մոտ»,- լրագրողներին ասել է Թրամփը Ասիա կատարած ուղևորության ժամանակ Air
Force One նախագահական ինքնաթիռում։
«Այսինքն՝
նկատի ունեմ, որ պարտադիր չէ, որ այն թռչի ութ հազար մղոն»,- ավելացրել է նա։
ԱՄՆ
նախագահի խոսքով՝ սպառազինությունը ցուցադրելու փոխարեն հարկ է, որ Մոսկվան
կենտրոնանա Ուկրաինայի հետ պատերազմը դադարեցնելու վրա։
«Ես չեմ
կարծում, որ Պուտինը պետք է նման հայտարարություններ անի։ Նա պետք է վերջ դնի
պատերազմին։ Պատերազմը, որը պետք է տևեր մեկ շաբաթ, այժմ չորրորդ տարին է, ինչ
ընթանում է։ Ահա թե ինչով նա պետք է զբաղվի, ոչ թե հրթիռներ փորձարկի»,- նշել է
Թրամփը։
Լրագրողների
հարցին Ռուսաստանի դեմ նոր պատժամիջոցներ սահմանելու հնարավորության մասին, ԱՄՆ նախագահը
պատասխանել է. «Կիմանաք»։
