ԱՄՆ նախագահ Դոնալդ Թրամփը հայտարարել է,
որ հանձնարարել է Պենտագոնին անհապաղ սկսել միջուկային զենքի փորձարկումները: Նա
համապատասխան հրապարակումը տեղադրել է Truth Social-ում:
Թրամփի խոսքով՝ Միացյալ Նահանգները «ունի
միջուկային զենքի ամենամեծ զինանոցը»:
«Ռուսաստանը երկրորդն է, իսկ Չինաստանը,
որը զգալիորեն հետ է մնում, զբաղեցնում է երրորդ տեղը, բայց հինգ տարվա ընթացքում
կհավասարվի: Կապված այլ երկրների փորձարկման ծրագրերի հետ՝ ես հանձնարարել եմ ռազմական
նախարարությանը սկսել մեր միջուկային զենքի փորձարկումները հավասար հիմունքներով:
Այս գործընթացը կսկսվի անհապաղ»,- գրել է Սպիտակ տան ղեկավարը:
Առայժմ հասկանալի չէ՝ Դոնալդ Թրամփը
արդյոք նկատի ունի՞ լիարժեք միջուկային պայթյունները, թե՞ մարտագլխիկների
ստուգումները՝ առանց պայթյունի։
Միացյալ Նահանգները լիարժեք միջուկային
զենքի փորձարկումներ չի անցկացրել 1992 թվականից ի վեր։ Վաշինգտոնը ստորագրել է,
բայց չի վավերացրել 1996 թվականի Միջուկային փորձարկումների համապարփակ արգելման մասին
պայմանագիրը: Այդ ժամանակվանից ի վեր Միացյալ Նահանգները առանց պայթյունի
մարտագլխիկների ստուգման ստորգետնյա միջուկային փորձարկումներ է անցկացնում
Նևադայի պոլիգոնում։
