ԱՄՆ-ը վստահ է, որ մոտ ապագայում կկարողանա գերազանցել Չինաստանին
անօդաչու թռչող սարքերի (ԱԹՍ) արտադրության տեմպերով։ Այս մասին CBS հեռուստաալիքի
եթերում հայտարարել է ԱՄՆ ցամաքային զորքերի նախարար Դենիել Դրիսկոլը։
Հաղորդավարուհին խնդրել է մեկնաբանել ԱՄՆ ղեկավարության ծրագրերը՝
առաջիկա 2-3 տարիների ընթացքում Պենտագոնի համար մեկ միլիոն ԱԹՍ ձեռք բերելու մասին,
ինչպես նաև մրցակցությունը Չինաստանի հետ։ Դրիսկոլի խոսքով՝ վերջին տասնամյակներում
ԱՄՆ-ը սխալ մոտեցում է ունեցել՝ զենքի արտադրությունը թողնելով միայն մասնավոր ընկերություններին
կամ ռազմական արդյունաբերության ձեռնարկություններին։
«ԱԹՍ-ների դեպքում մենք այլ կերպ կվարվենք։ Եթե նայենք Ուկրաինային,
նրանք տարեկան արտադրում են մոտ 4 միլիոն ԱԹՍ, իսկ Չինաստանը՝ մոտ 12-14 միլիոն։ Մենք
որպես երկիր պետք է ստանանք մասնավոր հատվածի աջակցությունը», — ասել է նա։
Նրա խոսքով՝ ԱՄՆ ցամաքային զորքերը մտադիր են ԱԹՍ-ների բաղադրիչները
արտադրել իրենց բազայում, իսկ մասնավոր ընկերությունները դրանք կգնեն։
«Այսպիսով, մենք կարտադրենք ԱԹՍ-ներ, մեր մասնավոր գործընկերները
նույնպես կարտադրեն, և մենք շատ արագ կգերազանցենք Չինաստանին», — վստահեցրել է Դրիսկոլը։
Հիշեցնենք , որ հունիսի սկզբին ԱՄՆ նախագահ Դոնալդ Թրամփը ստորագրել
է հրաման, ըստ որի՝ ԱՄՆ Դաշնային ավիացիոն վարչությունը պետք է արագացնի ամերիկյան
տեխնոլոգիաների մշակումը և փորձարկումը՝ ԱԹՍ-ների արտադրությունն ու արտահանումը մեծացնելու
նպատակով։
Բացի այդ, նա հանձնարարել է ուժեղացնել պաշտպանությունը ժամանակակից
ԱԹՍ-ներից։ Հուլիսին Fox News-ը հաղորդել է, որ Պենտագոնի ղեկավար Փիթ Հեգսեթը նույնպես
հանձնարարել է արագացնել ԱԹՍ-ների արտադրությունն ու տեղակայումը՝ փորձելով առաջ անցնել
Ռուսաստանից և Չինաստանից։
Թրամփը բազմիցս նշել է, որ ԱՄՆ զինված ուժերը ուսումնասիրում են
ԱԹՍ-ների կիրառման փորձը Ուկրաինայի ռազմական գործողությունների ընթացքում։
