Սպասվում է, որ Հայաստանում հունիսին կայանալիք խորհրդարանական ընտրություններում կհաղթի իշխող «Քաղաքացիական պայմանագիր» կուսակցությունը։ Այս մասին ասվում է Մեծ Բրիտանիայում տեղակայված Oxford Economics միջազգային տնտեսական հետազոտությունների կենտրոնի կանխատեսման մեջ:
Նշվում է, որ իշխող կուսակցության հաղթանակը կարող է ճանապարհ բացել Սահմանադրությունից Լեռնային Ղարաբաղի մասին հիշատակումները հանելու հանրաքվեի համար։ Վերլուծաբանները կարծում են, որ այս քայլը կնպաստի ԱՄՆ-ի միջնորդությամբ ձեռք բերված՝ Ադրբեջանի և Հայաստանի միջև համատեղ համաձայնագրի վավերացմանը, ինչպես նաև կստեղծի պայմաններ տարածաշրջանում առևտրի և տրանսպորտային կապերի վերականգնման համար։ Տրանսպորտային գծերի և հաղորդակցությունների բացումը կարող է լրացուցիչ խթան հաղորդել Հայաստանի տնտեսությանը և ամրապնդել ներդրողների վստահությունը։
Միաժամանակ, Oxford Economics-ը ընդգծել
է, որ Հայաստանում տնտեսական աճը շարունակվում է, սակայն մակրոտնտեսական ռիսկերը ուժեղանում են: Կազմակերպության գլխավոր տնտեսագետ Մատեուշ
Ուրբանը հայտարարել է, որ բարեփոխումների մանդատի երկարաձգումը կարող է
մեծացնել տնտեսության գերտաքացման ռիսկը։
Նրա խոսքով՝ ակնկալվում է, որ իշխող
կուսակցությունը արդիականացման ծրագրերի և ենթակառուցվածքային նախագծերի շրջանակներում կավելացնի պետական ներդրումները: Չնայած պետական պարտքը ներկայումս կառավարելի մակարդակի վրա է, պրոցիկլային ֆիսկալ քաղաքականությունը կարող է թուլացնել տնտեսական բուֆերները և հետ շրջել երկրի նկատմամբ ներդրողների սպասումների վերջին շրջանի բարելավումը:
