Ամերիկյան ԶԼՄ-ների փոխանցմամբ՝ ԱՄՆ Մինեսոտա նահանգի Հոփկինս քաղաքում գտնվող մանկապարտեզում տեղի ունեցած ենթադրյալ սպանություն-ինքնասպանության հետևանքով 2 մեծահասակ և 1 երեխա են մահացել:
Ամերիկյան ԶԼՄ-ները, հղում անելով տեղի ոստիկանությանը, հայտնում են, որ չորեքշաբթի առավոտյան Հոփկինսում գտնվող տնային մանկապարտեզում տեղի ունեցած միջադեպի հետևանքով տղամարդ, կին և երեխա են մահացել:
Հոփկինսի ոստիկանապետ Բրենտ Ջոնսոնի փոխանցմամբ՝ Թայլեր Ավենյու Նորթի 200 շենքի հասցեում գտնվող տանը, որտեղ գործում է մանկապարտեզը, իրենց երեխային մանկապարտեզ տանող ծնողներից մեկը դանակահարության մասին ահազանգել է առավոտյան ժամը 9-ից անմիջապես հետո: Մանկապարտեզում գտնվող մյուս վեց երեխաները, որոնք բոլորն էլ նկարագրվում են որպես «շատ փոքրահասակ», ֆիզիկապես չեն տուժել և արդեն գտնվում են իրենց ընտանիքների հետ:
Այս պահին ոստիկանությունը ենթադրում է, որ մահացածները ամուսիններ են և իրենց երեխան: Ջոնսոնի խոսքով՝ մեծահասակները, ամենայն հավանականությամբ, մանկապարտեզի սեփականատերերն են: Ըստ նախնական վարկածի՝ կասկածվում է, որ ընտանիքի հայրը սպանել է իր կնոջն ու երեխային, որից հետո վերջ է տվել նաև իր կյանքին:
Ոստիկանապետը հավելել է, որ սա առանձնացված միջադեպ է թվում, և հանրության համար հետագա սպառնալիք չկա: Քննիչները շարունակում են աշխատել՝ պարզելու ստացված վնասվածքների բնույթն ու օգտագործված զենքերի տեսակները:
