ՀՀ ՆԳՆ ոստիկանությունից հայտնում են, որ Երևանի քրեական ոստիկանները ձերբակալել են խուլիգանություն կատարած անձին․ նա իրավապահներին է ներկայացրել գազային ատրճանակը։
Օգոստոսի 9-ին ՆԳՆ 112 օպերատիվ կառավարման կենտրոն հաղորդում էր ստացվել, որ Աշտարակի խճուղում մեքենայից գազային ատրճանակով օդ են կրակել ու հեռացել։ Փաստի առթիվ Աջափնյակ և Դավթաշեն վարչական շրջանների քննչական բաժնում խուլիգանության հատկանիշներով նախաձեռնվել էր քրեական վարույթ։
Քրեական ոստիկանության Երևան քաղաքի վարչության ծառայողները, ստացված տեղեկություններն իրացնելիս, ձեռնարկված օպերատիվ-հետախուզական միջոցառումների արդյունքում պարզել են, որ գազային ատրճանակով 4 անգամ օդ կրակոց արձակած և փախուստի դիմած անձը Երևանի 19-ամյա բնակիչ է։
Նա հայտնաբերվել, ձերբակալվել և ներկայացվել է նախաքննական մարմին։ Մայրաքաղաքի 19-ամյա բնակիչը իրավապահներին է ներկայացրել նաև գազային ատրճանակը։
Նախաքննությունը շարունակվում է։
