ԱԺ նախկին պատգամավոր, «Երկիր ծիրանի» կուսակցության ղեկավար Զարուհի Փոստանջյանի գործով այսօրվա դատական նիստը հետաձգվել է՝ դատավորի՝ վերապատրաստման դասընթացներով պայմանավորված։ Այս մասին Civic.am-ի հետ զրույցում տեղեկացրեց Զարուհի Փոստանջյանի պաշտպան Հայկ Ալումյանը։

Նշենք, որ Զարուհի Փոստանջյանի հայտարարությունների հիմքով քրեական գործ էր հարուցվել՝ ՔՕ 226․2-րդ հոդվածի 1-ին մասով։ Ըստ մեղադրանքի՝ Զարուհի Փոստանջյանը 2021թ․մարտի 15-ին Երևան քաղաքի Աջափնյակ վարչական շրջանում տեղադրված  «Սողոմոն Թեհլերյանի» արձանի մոտ, հասարակության բազմաթիվ անդամների ներկայությամբ ունեցած ելույթի ընթացքում ՀՀ վարչապետ Նիկոլ Փաշինյանի և նրա գործընկերների նկատմամբ քաղաքական ու այլ հայացքներով պայմանավորված հնչեցրել է բռնությունը՝ սպանությունը, հրապարակայնորեն արդարացնող կոչեր:

Մեղադրանքում նշված է նաև, որ նա այդ կոչերը հնչեցրել է Հայաստանում հետապատերազմյան իրադրությամբ պայմանավորված հասարակության մոտ առկա տրամադրությունները և սոցիալ-հոգեբանական խոցելի իրավիճակն օգտագործելով։

Զարուհի Փոստանջյանի շահերի պաշտպան Հայկ Ալումյանի խոսքով՝ Զարուհի Փոստանջյանը հաստատում է իր հրապարակային խոսքերը, սակայն համարում է, որ դրանցում բացակայում է հանցակազմը և չի ընդունում իրեն առաջադրված մեղադրանքը։ Պաշտպանը նաև մեզ տեղեկացրեց, որ հաջորդ դատական նիստի ժամանակ Զարուհի Փոստանջյանը ցուցմունք է տալու և հիշատակեց, որ տիկին Փոստանջյանը նախաքննության ընթացքում ցուցմունք չի տվել, քանի որ չի վստահել գործը քննող քննիչին։ 

Հիշեցնենք, որ Սողոմոն Թեհլերյանի կողմից Թալեաթին սպանելու 100-ամյակի կապակցությամբ միջոցառման ժամանակ Զարուհի Փոստանջյանն ասել էր. «Նիկոլ, գալու ենք հետևիցդ։ Թալեաթին Թեհլերյանը կրակեց և գիտես ինչ եղավ, սպասիր, Նիկոլ, վախը սրտումդ սպասիր։ Մի գուցե ուշացնում ենք, բայց գալու է այդ օրը, Թեհլերյանը դա արեց 15 թվականից 6 տարի անց։ Դու և գործընկերներդ սպասեք, քեզ ո՛չ Էրդողանն է օգնելու, ո՛չ Ալիեւը։ Դու Դուշանբեում՝ վերելակի մեջ, ստացար քո մահվան համբույրը։ Սպասիր, Նիկոլ, գլխիցդ քեզ խփելու են, հերթ են կանգնած, ոչ միայն տղամարդիկ,այլ նաեւ կանայք»։