«Նախ հուսով եմ, որ ոչ մի տեղ, ոչ մի երկրում պատերազմ չի լինի, և հետո, Իրանի բարձրաստիճան պաշտոնյաները հստակ և բազմիցս հայտարարել են, որ երկրների տարածքային ամբողջականությունն ու միջազգայնորեն ճանաչված սահմանները պետք է հարգվեն։ ԻԻՀ ԱԳ նախարարը ևս մեկ անգամ շեշտեց դա։ Մենք հիմա Կապանում ենք, և Իրանի ԱԳ նախարարը շեշտեց, որ ՀՀ անվտանգությունը Իրանի անվտանգությունն է, ու շեշտում ենք, որ սահմանների որևէ փոփոխություն չենք ճանաչելու։ Մենք ցանկանում ենք խաղաղ և կայուն Հայաստան։ Ես Կապանի բնակչության համար ևս մեկ անգամ շեշտում եմ՝ չանհանգստանաք, ես Կապանում եմ»,- լրագրողների հետ զրույցում ասաց Կապանում Իրանի գլխավոր հյուպատոս Աբեդին Վարամինը։
Անդրադառնալով Իրանի և Հայաստանի միջև զենքի առևտրին՝ հյուպատոսն ասաց, որ այդ հարցը պետք է ուղղել պաշտպանական ոլորտի պատասխանատուներին։ «Կարծում եմ՝ երկու երկրների պաշտպանական ոլորտի պատասխանատուները միմյանց հետ կապի մեջ են և փոխայցելություններ ու քննարկումներ ունենում են։ Կարծում եմ՝ ՀՀ-ն երբեք հարձակողական զենքերի կարիք չի ունենա», - ասաց հյուպատոսը։
Անդրադառնալով հարցին, թե իրանցի պաշտոնյաների հայտարարությունները, որ Թեհրանը չի ցանկանում տարածաշրջանում օտարերկրյա ներկայություն, վերաբերո՞ւմ են Հայաստան-Ադրբեջանն սահմանին ԵՄ քաղաքացիական դիտորդներին, թե՞ ոչ, Աբեդին Վարամինը ասաց, որ այդ հարցը պետք է ուղղել Իրանի ԱԳ նախարարին։ «Հավանաբար, միգուցե ԱԳ նախարարը նկատի ուներ օտարերկրյա զինված, ռազմական միավորումներին, որոնք հավանաբար կարող են ներկայություն ունենալ տարածաշրջանում։ Մենք միշտ ընդգծել ենք, որ տարածաշրջանի երկրները իրենց անվտանգությունը ապահովելու նպատակով օտարերկրյա զինված ուժերի ներկայության կարիքը չունեն թե՛ երկրի հարավում, թե՛ հյուսիսում»,- ասաց հյուպատոսը։
Թե ի՞նչ քայլեր կձեռնարկի Թեհրանը, եթե պատմական սահմանները խախտվեն, Աբեդին Վարամինն ասաց. «Նման իրավիճակ մենք իրականությունում չունենք։ Մենք՝ իրանցիներս, ավելի շատ գործի մարդ ենք, քան խոսքի։ Մենք հուսով ենք, որ որևէ երկիր իրեն թույլ չի տա իր սահմաններից դուրս գործողություններ իրականացնել, հակառակ դեպքում Իրանի կողմից համապատասխան հակազդեցություն կցուցաբերվի»։ Թե կոնկրետ ի՞նչ գործողության մասին է խոսքը, Աբեդին Վարամինն ասաց. «Որպես դիվանագետ կարող եմ ասել, որ այդ հակազդեցությունը լինելու է տվյալ գործողությանը համարժեք»։
