ԱՄՆ նախագահի թեկնածու Քամալա Հարիսը նախընտրական ելույթ է ունեցել Չիկագոյում Դեմոկրատների ազգային համագումարում։ Նա խոստացել է շարունակել աջակցել Ուկրաինային ռուսական ագրեսիայի դեմ պայքարում և միշտ պաշտպանել Իսրայելի ինքնապաշտպանության իրավունքը։

Հարիսը հիշեցրել է, որ ռուսական զորքերի լայնամասշտաբ ներխուժումից հինգ օր առաջ նա հանդիպել է Ուկրաինայի նախագահ Վլադիմիր Զելենսկու հետ, որպեսզի նախազգուշացնի նրան հարձակման ծրագրի մասին։ Պատերազմի սկսվելուց հետո նա օգնել է միավորել ավելի քան 50 երկրների ջանքերը՝ աջակցելու Ուկրաինային: «Եվ որպես նախագահ՝ ես ամուր կկանգնեմ Ուկրաինայի և ՆԱՏՕ-ի մեր դաշնակիցների կողքին»,- ասել է Հարիսը իր նախընտրական ելույթում:

Նա անդրադարձել է նաև Իսրայելին աջակցելու թեմային։ Հարիսի խոսքով՝ Սպիտակ տան վարչակազմն աշխատում է «շուրջօրյա»՝ մոտենալու համար իսրայելցի պատանդներին ազատ արձակելու գործարքին և Գազայի հատվածում հրադադարին: Միաժամանակ նա խոստացել է թույլ չտալ հոկտեմբերի 7-ի կրկնություն։

«Ես միշտ պաշտպանելու եմ Իսրայելի ինքնապաշտպանության իրավունքը: Եվ ես միշտ ապահովելու եմ Իսրայելին իրեն պաշտպանելու հնարավորությամբ, քանի որ Իսրայելի ժողովուրդն այլևս երբեք չպետք է բախվի այն սարսափին, որ հոկտեմբերի 7-ին գործեց ՀԱՄԱՍ կոչվող ահաբեկչական կազմակերպությունը՝ ներառյալ երաժշտական ​​փառատոնի ժամանակ երիտասարդ մարդկանց անասելի բռնությունն ու զանգվածային սպանությունը»,- հայտարարել է ԱՄՆ նախագահի դեմոկրատ թեկնածուն:

Հարիսը հայտարարել է, որ այն, ինչ տեղի է ունենում Գազայի հատվածում վերջին տասը ամիսներին, «կործանարար» է, իսկ բնակչության տառապանքների մասշտաբը, որոնք ստիպված էին փախստական դառնալ և սովի մատնվել, «սրտաճմլիկ է»: Նա ևս մեկ անգամ հավաստիացրել է, որ ԱՄՆ գործող նախագահ Ջո Բայդենի հետ աշխատում է վերջ դնել այս պատերազմին, ինչպես նաև հավելել է, որ կձեռնարկի ցանկացած գործողություն, որն անհրաժեշտ է պաշտպանելու համար Միացյալ Նահանգների ուժերն ու շահերը Իրանից և Իրանի կողմից աջակցություն ստացող ահաբեկիչներից։