Կինը, որն իրեն անվանում է Պավել Դուրովի երեք երեխաների մայր, հայց է ներկայացրել դատարան՝ նրան մեղադրելով երեխաներից մեկի նկատմամբ ֆիզիկական բռնության մեջ։

Ինչպես հաղորդում է Forbes-ը, Իրինա Բոլգարը, որն ապրում է Շվեյցարիայում և իրեն անվանում է միլիարդատիրոջ երեք երեխաների մայր, դատական ​​հայց է ներկայացրել նրանցից մեկի նկատմամբ բռնություն գործադրելու մեղադրանքով։ Նախկինում համարվում էր, որ Դուրովն ընդամենը երկու երեխա ունի։ Բազմազավակ մայրը պնդում է, որ միլիարդատերը 2021-2022 թվականների ընթացքում հինգ անգամ բռնության է ենթարկել իր որդուն։ Հայցը հայտնվել է այն բանից հետո, երբ Դուրովը մի քանի ամիս Բոլգարին չի վճարել 150 հազար եվրոյի չափով ալիմենտ։

Հայցում նշվում է, որ նրա որդին ֆիզիկական և հոգեկան տրավմաներ է ստացել։ Կինը դատարանին դա հաստատող բժշկական փաստաթղթեր է ներկայացրել։ Գործում ներառված է նաև Բոլգարի նամակագրությունը իր նախկին քաղաքացիական ամուսնու հետ: Բացի դրանից, նա դիմել է Forbes-ին՝ խնդրելով միլիարդատերերի վարկանիշում Դուրովի երեխաների թիվը փոխել հինգի՝ խմբագրություն ուղարկելով հայրությունը հաստատող փաստաթղթերի պատճենները:

Ավելի ուշ պարբերականը հայտնել է, որ երեխաները իսկապես Դուրովինն են: Telegram-ի հիմնադրի ներկայացուցիչներն առայժմ ձեռնպահ են մնացել այս գործով մեկնաբանություններից։ Նշենք, որ Դուրովն ավելի վաղ հայտարարել էր, որ ունի մոտ 100 կենսաբանական երեխա ամբողջ աշխարհում, քանի որ սերմնահեղուկի դոնոր է։