Թուրքիան ցանկանում է ԱՄՆ-ից ձեռք բերել նոր սերնդի F-35 կործանիչներ՝ հունական ավիացիայի նկատմամբ գերակայություն ձեռք բերելու համար, գրում է Cumhuriyet թերթը՝ հղում անելով իրազեկ աղբյուրներին։

Պարբերականի տեղեկություններով՝ Անկարան F-35 մատակարարման ծրագրին վերադառնալու բանակցությունների ժամանակ Վաշինգտոնին ասել է, որ հանուն ռազմական ինքնաթիռների ձեռք բերման չի ակտիվացնի ռուսական կողմից գնված С-400 ՀՕՊ համակարգերը։ Այդ համալիրները Թուրքիան ձեռք է բերել Ռուսաստանի Դաշնությունից 2,5 մլրդ դոլարով, սակայն դրանք այդպես էլ շահագործման չեն հանձնվել և մինչ օրս պահվում են թուրքական պահեստներում, նշում է պարբերականը։

Անկարայում ամերիկյան դեսպանատան բարձրաստիճան ներկայացուցիչը չի հերքել այս տեղեկությունը։ «Այժմ գնդակը Թուրքիայի դաշտում է, նրանց լավ հայտնի են F-35-ի գնման համար պահանջները»,- ասել է նա պարբերականի հետ զրույցում։