Այսօր հրավիրված մամուլի ասուլիսում «Տաշիր» ընկերությունների խմբի փոխնախագահ, ՀԷՑ-ի տնօրենների խորհրդի  նախագահ Կարեն Դարբինյանը անդրադարձավ վերջին շրջանում տեղի ունեցած աղմկահարույց հոսանքազրկումներին:

Մասնավորապես, Կառավարության նիստի ընթացքում տեղի ունեցած աղմկահարույց հոսանքազրկման վերաբերյալ պարոն Դարբինյանն ասաց, որ հետաքննության արդյունքում պարզ էր դարձել, որ էլեկտրականության անջատումը տեղի էր ունեցել ԲԷՑ-ում կատարվող աշխատանքների պատճառով. «Արդյունքում հոսանքազրկվել էր հանրապետության մոտ մեկ երրորդը և ՀԷՑ-ի պատասխանատվության դաշտից դուրս էր»:

Նրա խոսքով՝ ԲԷՑ-ում կատարվող աշխատանքների պատճառով էլէներգիայի անջատումը կարճատև է լինում՝ մոտ 15-20 րոպե, սակայն ժողովրդի մոտ մեծ արձագանք է ստանում, քանի որ տեղի է ունենում մասշտաբային անջատում. «Երևան քաղաքի կեսը անջատվում է, Արմավիրի մարզի կեսը անջատվում է»:

Ինչ վերաբերում է օգոստոսի 7-ին Օպերայի և բալետի ազգային ակադեմիական թատրոնում ներկայացման ժամանակ էլէներգիայի անջատմանը, բանախոսը նշեց, որ մինչ այդ էլ այնտեղ մի քանի անգամ հոսանքազրկումներ էին տեղի ունեցել: «Մեր ընկերությունը մի քանի ստուգայցերի ընթացքում պարզել էր, որ խնդիրը իրենց բալանսում գտնվող տրանֆորմատորի թերության հետ է կապված»,- ասաց նա և հավելեց, որ թատրոնը անտեսել էր իրենց մասնագետների՝ տրանսֆորմատորներից մեկը փոխելու կարծիքը, և դեռ ավելին՝ որոշել էին ՀԷՑ-ին մեղադրել:  

Պարոն Դարբինյանն անդրադարձավ նաև Աբովյանի մարզադաշտում տեղի ունեցած հոսանքազրկմանը, ինչի առնչությամբ էլ ասաց, որ տրանսֆորմատորը ՀՖՖ-ի դիմումի հիման վրա էր անջատվել, և ամբողջ բեռն ընկել էր մեկ տրանսֆորմատորի վրա, որը չդիմանալով ծանրաբեռնվածությանը՝ անջատվել էր:

«Մի քանի օր առաջ էլ համակարգից դուրս եկավ ՀԱԷԿ-ը, որի հետևանքով հոսանքազրկվեցին Երևանի մի շարք վարչական շրջաններ, Էջմիածնի, Արմավիրի տարածաշրջանները: Բոլորիդ հայտնի է դեպքը, բայց ի վերջո հոսանքազրկվում են մեր բաժանորդները»,- ասաց Դարբինյանը: