Նյու Յորքի քաղաքապետ Էրիկ Ադամսին մեղադրանք է առաջադրվել կոռուպցիայի գործով դաշնային հետաքննության շրջանակներում, գրում են The New York Times-ը և CBS News-ը՝ հղում անելով աղբյուրներին։
Մեղադրական եզրակացության էությունը հայտնի չէ։ The
New York Times-ի տեղեկություններով՝ դաշնային հետաքննությունն առնչվում է Ադամսի՝ թուրքական կառավարության հետ կապված
մարդկանց կողմից նվիրատվությունների հնարավոր
ստացման հետ:
Քաղաքապետի նկատմամբ հետաքննությունը, ըստ The New York
Times-ի, սկսվել է դեռևս 2021 թվականին, երբ Մանհեթենի դաշնային դատախազները ստուգում
էին, թե արդյոք Ադամսը ճնշո՞ւմ
է գործադրել հրշեջ ծառայության պաշտոնատար անձանց վրա, որպեսզի վերջիններս
հավանություն տան թուրքական կառավարության համար նոր բարձրահարկ հյուպատոսության
շենքի բացմանը: Քննիչները նաև պարզում են, թե արդյոք Ադամսը ստացե՞լ է անվճար թռիչքներ և Turkish Airlines ավիաընկերությունում,
որը մասամբ պատկանում է Թուրքիայի կառավարությանը, սպասարկման դասի բարձրացում:
Ինչպես նշում է The New York Times-ը, երբ մեղադրական
եզրակացությունը հրապարակվի, Ադամսը կդառնա Նյու Յորքի առաջին քաղաքապետը, ում կառաջադրվի
դաշնային մեղադրանք պաշտոնավարման ընթացքում:
Ադամսի խոսքով՝ քաղաքապետի պաշտոնում իր պաշտոնավարման
ընթացքում ինքն այցելել է միայն Իսրայել և Կատար: Նա հայտարարել է, որ իրեն
թիրախավորել են, և որ ինքն անմեղ է ու մեղադրանքի դեպքում կպայքարի «բոլոր
ուժերով»:
