Անկարայի և Կիևի միջև ռազմատեխնիկական համագործակցության շարունակությունը տարակուսանք է առաջացնում՝ ուկրաինական ճգնաժամի կարգավորմանն օգնելու պատրաստակամության մասին Թուրքիայի իշխանությունների հայտարարությունների ֆոնին։ Այս մասին թուրքական Hurriyet թերթին հայտնել է ՌԴ ԱԳ նախարար Սերգեյ Լավրովը։

«Դժբախտաբար, Անկարան շարունակում է համագործակցել Կիևի ռեժիմի հետ ռազմատեխնիկական ոլորտում: Թուրքական զենքն Ուկրաինայի ԶՈՒ-ի կողմից օգտագործվում է ռուս զինվորականներին և խաղաղ բնակիչներին սպանելու համար: Սա չի կարող տարակուսանք չառաջացնել միջնորդական ծառայություններ տրամադրելու պատրաստակամության մասին Թուրքիայի ղեկավարության հայտարարությունների ֆոնին»,- ասել է նա։

Մոսկվան գնահատում է Թուրքիայի ջանքերը՝ օգնելու ուկրաինական ճգնաժամի կարգավորմանը, ասել է Լավրովը՝ նշելով, որ հենց թուրքական կողմն է 2022 թվականի գարնանը տրամադրել Ստամբուլի հարթակը Կիևի ներկայացուցիչների հետ խորհրդակցությունների համար և նպաստել «հացահատիկի գործարքի» կնքմանը։

Լավրովի խոսքով՝ Ռուսաստանը բաց է քաղաքական կարգավորման համար, սակայն խոսքը պետք է լինի ոչ թե ժամանակավոր հրադադարի մասին, այլ հակամարտությունը դադարեցնելու՝ դրա սկզբնապատճառները վերացնելու միջոցով։ Դրանց թվում են ՆԱՏՕ-ի ընդլայնումը դեպի արևելք, Ռուսաստանի անվտանգության կենսական շահերի համար սպառնալիքների ստեղծումը, ռուսների և Ուկրաինայի ռուսալեզու բնակիչների իրավունքների ոտնահարումը։

«Այս պահին խաղաղությունը չի մտնում մեր հակառակորդների պլանների մեջ: Այս տարվա հունիսին նախագահ Վլադիմիր Պուտինի կողմից առաջադրված խաղաղության նախաձեռնությանը Ուկրաինայի պատասխանը եղավ Ուկրաինայի զինված ուժերի ներխուժումը Կուրսկի մարզ, օդային գրոհները այլ սահմանամերձ տարածաշրջաններում օբյեկտների վրա։ Վաշինգտոնը և նրա դաշնակիցները համակողմանի աջակցություն են ցուցաբերում Կիևին, քննարկում են արևմտյան հեռահար հրթիռների կիրառման հնարավորությունը Ռուսաստանի խորքերը հարվածելու համար:  Վլադիմիր Զելենսկին չի չեղարկել Մոսկվայի հետ բանակցություններն արգելող իր հրամանագիրը: Հազիվ թե նման իրավիճակում որևէ երկրի միջնորդական ջանքերը հաջողության շանս ունենան, այդ թվում՝ Թուրքիայի»,- ասել է Լավրովը։