ԱՄՆ նորընտիր նախագահ Դոնալդ Թրամփը անցյալ շաբաթ հեռախոսազրույց է ունեցել Ռուսաստանի նախագահ Վլադիմիր Պուտինի հետ։ The Washington Post-ը, հղում անելով իրազեկ աղբյուրներին, մանրամասներ է հայտնում այդ զրույցից և նշում, որ նրանք քննարկել են Ուկրաինայում պատերազմը:

Հրապարակման մեջ ասվում է, որ Թրամփը Պուտինին կոչ է արել միջոցներ ձեռնարկել հետագա էսկալացիայից խուսափելու համար, ինչպես նաև հիշեցրել է նրան «Եվրոպայում Վաշինգտոնի նշանակալի ռազմական ներկայության մասին»:

Դոնալդ Թրամփը խոսել է նաև Ուկրաինայի նախագահ Վլադիմիր Զելենսկու հետ և, ինչպես հայտնում է Reuters-ը, հայտնել, որ աջակցելու է Կիևին:

Ռուսաստանի նախագահի մամուլի քարտուղար Դմիտրի Պեսկովն էլ կիրակի հարցազրույց է տվել «Մոսկվա. Կրեմլ. Պուտին» հաղորդումը վարող Պավել Զարուբինին և ընդգծել, որ Թրամփը իր նախընտրական քարոզարշավի ընթացքում «համենայնդեպս խոսել է խաղաղության մասին»։ «Նա չի խոսում Ռուսաստանին ռազմավարական պարտություն պատճառելու ցանկության մասին, և դա նրան շահեկանորեն տարբերում է գործող վարչակազմից»,- Պեսկովի խոսքերն է մեջբերում «Ինտերֆաքս»-ը։