Ռուսաստանի արտգործնախարար Սերգեյ Լավրովը վստահ է, որ ժամանակի ընթացքում Հարավային Կովկասի երկրներն ինքնուրույն կլուծեն տարածաշրջանային խնդիրները։ Այս մասին նա հայտարարել է մամուլի ասուլիսում՝ մեկնաբանելով «3+3» ձևաչափի պահանջարկը, որում ընդգրկված են Ռուսաստանը, Հայաստանը, Իրանը, Ադրբեջանը, Թուրքիան և Վրաստանը։

Նրա խոսքով՝ այս ձևաչափն ամենաարդյունավետն է տարածաշրջանում խնդիրների լուծման համար։ Լավրովն ընդգծել է, որ Հայաստանի և Ադրբեջանի միջև բանակցային գործընթացին միջամտելու ԱՄՆ-ի և ԵՄ-ի փորձերը միայն բարդացնում են այն։ 

«Երբ երկրները, որոնք հեռու են մեր տարածքներից, ավանդույթներից և պատմությունից, հայտարարում են, որ իրենք են ապահովելու Սյունիքի մարզում անվտանգությունը, դա հարցեր է առաջացնում։ Օրինակ՝ ես ամբողջովին չեմ հասկանում, թե ինչպես կարող է ԵՄ առաքելությունը նման խնդիր կատարել»,- նշել է ՌԴ ԱԳ նախարարը։

Նա նաև ուշադրություն է հրավիրել Բրյուսելի և Վաշինգտոնի ձգտման վրա՝ «ցուցադրելու» իրենց մասնակցությունը Հայաստանի և Ադրբեջանի միջև խաղաղության պայմանագրի կնքման գործընթացին։

«Ես այժմ լսեցի, որ Ադրբեջանն ու Հայաստանն արդեն գործնականում համաձայնության են եկել խաղաղության պայմանագրի շուրջ: Եվ հասկանալի է, որ մնացած երկու հարցերը, դրանք... Դժվար է ինչ-որ կերպ շրջանցել դրանք: Եվ հենց այդ ժամանակ Եվրահանձնաժողովը, Եվրամիությունը սկսում են ասել՝ մենք հիմա կգանք, մենք ձեզ կօգնենք: Ադրբեջանի, Հայաստանի ինքնիշխան որոշումն է, թե որտեղ կստորագրեն փաստաթուղթը, երբ այն կլինի համաձայնեցված: Բայց Բրյուսելը, Վաշինգտոնը ևս ձգտում են ինչ-որ կերպ ցույց տալ, որ ամեն ինչ իրենք են արել... Նման ասացվածքներ կան, դրանք այնքան էլ պարկեշտ չեն... Բայց ամեն տեղ ուզում ես ցույց տալ, որ  դու ես տերը»,- հայտարարել է նա։