Միացյալ Նահանգները կցանկանար «գերազանց գործարք» կնքել Իրանի հետ՝ Թեհրանի միջուկային մշակումների շուրջ ստեղծված իրավիճակը կարգավորելու համար։ Այս մասին ԱՄՆ նախագահ Դոնալդ Թրամփը հայտարարել է Սպիտակ տանը Իսրայելի վարչապետ Բենիամին Նեթանյահուի հետ համատեղ մամուլի ասուլիսում։

«Ես կասեմ հետևյալը և սա կասեմ Իրանի համար, որը շատ ուշադիր լսում է։ Ես կցանկանայի ի վիճակի լինել կնքելու գերազանց գործարք»,- հաստատել է նա:

«Հուսով եմ՝ մենք կարող ենք ինչ-որ բանի հասնել, որպեսզի գործը չավարտվի շատ աղետալի իրավիճակով։ Ես չեմ ուզում, որ դա տեղի ունենա։ Ես իսկապես ցանկանում եմ խաղաղություն տեսնել»,- վստահեցրել է Թրամփը:

Միաժամանակ նա զգուշացրել է, որ Վաշինգտոնը թույլ չի տա Թեհրանին միջուկային զենք ստանալ. «Նրանք չեն կարող ունենալ միջուկային զենք։ Ամեն ինչ շատ պարզ է»:

Սպիտակ տանը լրագրողների հետ զրույցում Թրամփը հնարավոր է համարել Իրանի նախագահ Մասուդ Փեզեշքիանի հետ հանդիպումը։ Իրանի վրա ԱՄՆ առավելագույն ճնշումը վերականգնելու հրամանագրի ստորագրումից հետո Թրամփը հույս է հայտնել, որ «ստիպված չի լինի դրանից շատ հաճախ օգտվել»։ Հարցին, թե արդյոք նա կքննարկի՞ Իրանի նախագահի հետ հանդիպման կամ ուղիղ շփման հնարավորությունը, Թրամփը դրական պատասխան է տվել:

Թրամփին նաև հարցրել են, թե ինչ հետևանքներ կարող է սպառնալ Իրանին, եթե իր կամ իր թիմի անդամների դեմ մահափորձ կատարվի։ «Եթե նրանք դա անեն, կոչնչացվեն, դա կլինի վերջը»,- ասել է ԱՄՆ առաջնորդը։