ԱՄՆ-ը չի բացառում, որ կարող են պատժամիջոցներ սահմանել Ռուսաստանի դեմ կամ իրենց զորքերն ուղարկել Ուկրաինա, եթե ՌԴ նախագահ Պուտինը չհամաձայնի խաղաղության պայմանագրին, որը Կիևին կերաշխավորի երկարաժամկետ անկախություն, The Wall Street Journal-ին տված հարցազրույցում հայտնել է ԱՄՆ փոխնախագահ Ջեյ Դի Վենսը:  

«Կան ճնշման տնտեսական լծակներ, կան, իհարկե, նաև ճնշման ռազմական լծակներ»,- ասել է Վենսը։ Նրա խոսքով՝ Ուկրաինա ամերիկյան զորքեր ուղարկելու տարբերակը մնում է «օրակարգում», եթե Մոսկվան հրաժարվի բանակցություններից։

ԱՄՆ փոխնախագահի կարծիքով՝ Ռուսաստանի հետ բանակցությունների արդյունքում կարող է ստացվել «գործարք, որը շատերին կցնցի»։ Միաժամանակ նա նշել է, որ բանակցությունների ընթացքում Թրամփը կարող է փոխել իր կարծիքը այս կամ այն հարցի շուրջ։ Նրա վարչակազմի նպատակն է այժմ Պուտինին համոզել, որ նա դիվանագիտական ​​ճանապարհով կարող է հասնել ավելիին, քան մարտի դաշտում։.

Վենսը հավելել է, որ դեռ վաղ է խոսել այն մասին, թե Ուկրաինայի որ հատվածը կարող է մնալ Ռուսաստանի վերահսկողության տակ, կամ անվտանգության ինչ երաշխիքներ կարող են Կիևին առաջարկել ԱՄՆ-ը և արևմտյան այլ երկրներ։ Այս մանրամասները, նրա խոսքով, պետք է մշակվեն խաղաղ բանակցությունների ընթացքում։ «Կան բազմաթիվ ձևակերպումներ, կոնֆիգուրացիաներ, բայց մեզ հուզում է Ուկրաինայի ինքնիշխան անկախությունը»,- ասել է ԱՄՆ փոխնախագահը։

Բացի դրանից, Վենսն առաջարկել է վերբեռնել հարաբերությունները Ռուսաստանի հետ Ուկրաինայի հարցով բարեհաջող խաղաղության պայմանագրից հետո: ԱՄՆ փոխնախագահի կարծիքով՝ Մոսկվայի ներկայիս մեկուսացումը արևմտյան շուկաներից նրան դարձնում է «Պեկինի կրտսեր գործընկերը»։