Էր Ռիադում ավարտվել են Ռուսաստանի և ԱՄՆ-ի պատվիրակությունների բանակցությունները։ Այս մասին հայտարարել է ՌԴ նախագահի օգնական Յուրի Ուշակովը, փոխանցում է «Ինտերֆաքս»-ը։ Ռուս-ամերիկյան բանակցությունները տևել են 4,5 ժամ։

Հանդիպման ընթացքում քննարկվել է նաև ռուս-ուկրաինական պատերազմը։

«Այո, մենք քննարկեցինք [այդ թեման] ու շարադրեցինք մեր հիմնարար մոտեցումները և պայմանավորվեցինք, որ այս թեմայով բանակցողների առանձին թիմերը ժամանակին շփման մեջ կմտնեն»,- հայտնել է Ուշակովը:

Ուշակովի խոսքով՝ քննարկվել է նաև Վլադիմիր Պուտինի և Դոնալդ Թրամփի հնարավոր հանդիպումը։ Նա նշել է, որ այն հազիվ թե կայանա հաջորդ շաբաթ։

«Այդ հարցը քննարկվել է, մենք կաշխատենք, որպեսզի պայմաններ ստեղծենք այդպիսի հանդիպման համար»,- ասել է ՌԴ նախագահի օգնականը։

Ուշակովը խոսակցությունն անվանել է «շատ լուրջ»։ Նրա կարծիքով՝ բանակցությունները «վատ չեն» ընթացել։ «Մենք պայմանավորվեցինք հաշվի առնել միմյանց շահերը, միևնույն ժամանակ առաջ մղել երկկողմ հարաբերությունները։ Դրանով շահագրգռված է և՛ Մոսկվան, և՛ Վաշինգտոնը»,- հայտարարել է Ուշակովը։ Հարցին, թե արդյոք Ռուսաստանն ու ԱՄՆ-ը մերձենո՞ւմ են, նա պատասխանել է, որ առայժմ «դժվար է ասել», բայց «այդ մասին խոսակցություն եղել  է»։