ԱՄՆ պետքարտուղար Մարկո Ռուբիոն եվրոպացի դաշնակիցներին հայտնել է, որ նախագահ Դոնալդ Թրամփի վարչակազմը կպահպանի Ռուսաստանի դեմ պատժամիջոցները առնվազն այնքան ժամանակ, մինչև համաձայնություն ձեռք չբերվի ռուս-ուկրաինական պատերազմի ավարտի մասին:

Ռուբիոն դրանում հավաստիացրել է «եվրոպական գործընկերների խմբին» հեռախոսազրույցի ժամանակ, որը տեղի է ունեցել Սաուդյան Արաբիայում Ռուսաստանի և ԱՄՆ ներկայացուցիչների միջև բանակցություններից անմիջապես հետո:

ԱՄՆ Պետդեպարտամենտը պաշտոնապես հայտնել է, որ Էր Ռիադում հանդիպումից հետո Ռուբիոն զանգահարել է Ֆրանսիայի, Գերմանիայի, Իտալիայի, Մեծ Բրիտանիայի արտաքին գործերի նախարարներին և եվրոպական դիվանագիտության ղեկավար Կայա Կալլասին։

«Պետքարտուղարը ԱԳ նախարարներին տեղեկացրել է այս հանդիպման մասին։ Նրանք պայմանավորվել են սերտ շփումներ պահպանել Ուկրաինայում հակամարտության երկարաժամկետ դադարին հասնելու աշխատանքի ընթացքում»,- ասվում է գերատեսչության մամուլի հաղորդագրության մեջ։

Փետրվարի 18-ին Էր Ռիադում ՌԴ և ԱՄՆ պատվիրակությունների միջև բանակցությունների արդյունքներով կայացած մամուլի ասուլիսի ժամանակ Ռուբիոն հայտարարել էր, որ արևմտյան երկրները ստիպված կլինեն չեղարկել Ռուսաստանի դեմ պատժամիջոցները ռուս-ուկրաինական պատերազմի ավարտի դեպքում։ «Ցանկացած հակամարտության դադարեցման համար անհրաժեշտ է, որ բոլոր կողմերը գնան զիջումների», - ասել է ԱՄՆ պետքարտուղարը՝ պատասխանելով Մոսկվայի դեմ Վաշինգտոնի կողմից սահմանված սահմանափակումների ապագայի մասին հարցին։