Ռուսաստանի արտգործնախարար Սերգեյ Լավրովը այսօր՝ փետրվարի 25-ին, այցելում է Թեհրան։

ՌԴ ԱԳՆ-ն հայտնել է, որ փետրվարի 25-ին ՌԴ ԱԳ նախարար Սերգեյ Լավրովը Իրանի Իսլամական Հանրապետության արտաքին գործերի նախարար Աբբաս Արաղչիի հրավերով աշխատանքային այց կկատարի Թեհրան։

Նախարարությունում նշել են, որ դիվանագիտական ​​գերատեսչությունների ղեկավարները առարկայորեն կքննարկեն ռուս-իրանական հարաբերությունների երկկողմ օրակարգը, որոնք պաշտոնապես հասել են համապարփակ ռազմավարական գործընկերության մակարդակի՝ հունվարի 17-ին Մոսկվայում նոր հիմնարար միջպետական ​​պայմանագրի ստորագրմամբ։

Ինչպես տեղեկացնում է ՌԴ ԱԳՆ-ն, բանակցությունների ընթացքում նախատեսվում է հատուկ շեշտը դնել փոխշահավետ առևտրատնտեսական համագործակցության հետագա ընդլայնման վրա՝ էներգետիկ և տրանսպորտի ոլորտներում առանցքային համատեղ նախագծերի իրագործման համատեքստում։

«Ենթադրվում է մտքերի փոխանակում մի շարք արդի միջազգային հարցերի շուրջ, ներառյալ իրավիճակը Սիրիայում, Հարավային Կովկասում, Աֆղանստանում, Եմենում, Պարսից ծոցի գոտում, մերձավորարևելյան կարգավորումը, Կասպիական խնդիրը և Իրանի միջուկային ծրագրի շուրջ Գործողությունների համատեղ համապարփակ ծրագրի շուրջ ստեղծված իրավիճակը»,- հավելել է ՌԴ ԱԳՆ-ն։